തിരുവനന്തപുരം: ഫുട്ബോള്‍ താരം ലയണല്‍ മെസ്സിയെ കേരളത്തില്‍ എത്തിക്കാമെന്ന് വാഗ്ദാനം ചെയ്ത് നടത്തിയ തട്ടിപ്പ് കേസില്‍ മുൻ കായിക മന്ത്രിയെ എസ്.ഐ.ടി ചോദ്യം ചെയ്തതിനെ കുറിച്ച്‌ വ്യക്തമായ അറിവില്ലെന്ന് കായിക മന്ത്രി ഒ.ജെ. ജനീഷ് പ്രതികരിച്ചു. കേസില്‍ അന്വേഷണ ഏജൻസിക്ക് പൂർണ്ണമായ സ്വാതന്ത്ര്യമുണ്ടെന്നും അദ്ദേഹം കൂട്ടിച്ചേർത്തു.
ഒരു തരത്തിലുള്ള ഇടപെടലുകളും നടത്താൻ ആഗ്രഹിക്കുന്നില്ലെന്നും നടപടിക്രമങ്ങള്‍ നിയമാനുസൃതം മുന്നോട്ട് പോകട്ടെ എന്നും അദ്ദേഹം വ്യക്തമാക്കി. അതേസമയം, കേസില്‍ മുൻ മന്ത്രി അബ്ദുറഹിമാനെയും പ്രതി ചേർത്തേക്കുമെന്നാണ് സൂചനകള്‍.
വിദേശയാത്രയിലടക്കം മുൻ മന്ത്രി അധികാര ദുർവിനിയോഗം നടത്തിയെന്ന വിവരത്തിന്റെ അടിസ്ഥാനത്തിലാണ് ഈ നീക്കം. അഴിമതി തടയല്‍ നിയമത്തിലെ വിവിധ വകുപ്പുകള്‍ ഉള്‍പ്പെടുത്തി അന്വേഷണം കൂടുതല്‍ വിപുലീകരിക്കാൻ പ്രത്യേക അന്വേഷണ സംഘം ഡി.ജി.പിക്ക് റിപ്പോർട്ട് നല്‍കുമെന്നാണ് വിവരങ്ങള്‍.
