മലപ്പുറം: നഴ്സിങ് പഠനം പൂർത്തിയാക്കിയതിന്റെ സർട്ടിഫിക്കറ്റ് വാങ്ങാൻ ബെംഗളൂരുവില് പോയ യുവാവിനെ കാണാതായി.
മലപ്പുറം താനൂർ സ്വദേശി ഇംതിയാസിനെയാണ് കാണാതായത്.
ഇയാളെ കാണാനില്ലെന്ന് കാണിച്ച് ബന്ധുക്കള് താനൂർ പൊലീസില് പരാതി നല്കി. പരാതിയുടെ അടിസ്ഥാനത്തില് പൊലീസ് കേസെടുത്ത് അന്വേഷണം ആരംഭിച്ചു.
നഴ്സിങ് കോഴ്സ് പൂർത്തിയാക്കിയ ഇംതിയാസ് സർട്ടിഫിക്കറ്റ് വാങ്ങുന്നതിനായാണ് കഴിഞ്ഞ ദിവസം ബെംഗളൂരുവിലേക്ക് പോയത്. ഓഗസ്റ്റ് 7 ന് ബെംഗളൂരുവില് എത്തിയ ഉടൻ ഇയാള് വീട്ടുകാരെ ഫോണില് ബന്ധപ്പെട്ടിരുന്നു. സുരക്ഷിതമായി എത്തിയെന്നും സർട്ടിഫിക്കറ്റ് സംബന്ധിച്ച കാര്യങ്ങള് നടത്തുന്നുണ്ടെന്നും അറിയിച്ചിരുന്നു.
എന്നാല് അതിന് ശേഷം ഇംതിയാസില് നിന്ന് യാതൊരു വിവരവും ലഭിച്ചിട്ടില്ല. തുടർച്ചയായി വിളിച്ചെങ്കിലും ഫോണ് സ്വിച്ച് ഓഫ് ആയിരുന്നു. ബന്ധുക്കളും സുഹൃത്തുക്കളും അന്വേഷിച്ചെങ്കിലും ഫലമുണ്ടായില്ല.
സംഭവത്തില് ആശങ്കയിലായ കുടുംബം താനൂർ പൊലീസില് പരാതി നല്കുകയായിരുന്നു. താനൂർ പൊലീസ് കേസെടുത്ത് അന്വേഷണം ആരംഭിച്ചു. ബെംഗളൂരു സിറ്റി പൊലീസുമായി ബന്ധപ്പെട്ട് ഇംതിയാസിന്റെ മൊബൈല് ലൊക്കേഷൻ ഉള്പ്പെടെയുള്ള വിവരങ്ങള് ശേഖരിക്കാനുള്ള നടപടികളും പൊലീസ് സ്വീകരിച്ചിട്ടുണ്ട്.
താമസിച്ചിരുന്ന സ്ഥലം, പോയ സ്ഥാപനം എന്നിവ കേന്ദ്രീകരിച്ചും അന്വേഷണം നടക്കുന്നുണ്ട്.
ഇംതിയാസിനെ കുറിച്ച് എന്തെങ്കിലും വിവരമുള്ളവർ താനൂർ പൊലീസ് സ്റ്റേഷനുമായോ ബന്ധുക്കളുമായോ ഉടൻ ബന്ധപ്പെടണമെന്ന് പൊലീസ് അഭ്യർത്ഥിച്ചു. അന്വേഷണം പുരോഗമിക്കുകയാണ്.
