അയ്മനം:ജീവകാരുണ്യ പ്രവർത്തനങ്ങളിലൂടെയും മോട്ടിവേഷൻ പ്രസംഗങ്ങളിലൂടെയും ശ്രദ്ധേയയായ അയ്മനം സ്വദേശി സുജാത ഭാസ്‌കറിന് ‘നിറവ് 2026’ പുരസ്കാരം നൽകി ആദരിച്ചു.
കോന്നി ആനക്കൂട്ടിൽ നടന്ന ‘നിറവ് 2026’ സംഗമത്തിലാണ് സുജാത ഭാസ്‌കറിനെ ആദരിച്ചത്.
സ്വസ്തി ചാരിറ്റബിൾ ട്രസ്റ്റിന്റെ സ്ഥാപകയായ സുജാത ഭാസ്‌കർ ഭിന്നശേഷിക്കാർക്കും കിടപ്പുരോഗികൾക്കും
വയോജനങ്ങൾക്കും നിരാലംബർക്കും താങ്ങും തണലുമായി നടത്തുന്ന സേവനപ്രവർത്തനങ്ങൾക്കുള്ള അംഗീകാരമായാണ് പുരസ്കാരം ലഭിച്ചത്.
ജീവിതത്തിലെ പ്രതിസന്ധികളെ ആത്മവിശ്വാസത്തോടെ നേരിടാനും പ്രതീക്ഷയോടെ മുന്നോട്ടുപോകാനും പ്രചോദനം നൽകുന്ന മോട്ടിവേഷൻ പ്രസംഗങ്ങളിലൂടെയും സുജാത ശ്രദ്ധേയയാണ്.
സമൂഹമാധ്യമങ്ങളിലൂടെ കാരുണ്യത്തിന്റെയും ആത്മവിശ്വാസത്തിന്റെയും സന്ദേശങ്ങൾ ജനങ്ങളിലേക്ക് എത്തിക്കുകയും അർഹരായവരുടെ ജീവിതപ്രയാസങ്ങൾ സമൂഹത്തിന്റെ ശ്രദ്ധയിൽപ്പെടുത്തുകയും ചെയ്യുന്നു.
സുജാത ഭാസ്‌കറിനൊപ്പം സ്വസ്തി ചാരിറ്റബിൾ ട്രസ്റ്റ് ചെയർമാൻ സന്തോഷ് കണ്ണംകേരിയും കോ-ഓർഡിനേറ്റർ ബിന്ദു കുമരകവും ഇതേ വേദിയിൽ ആദരവ് ഏറ്റുവാങ്ങി.
സ്വസ്തി ചാരിറ്റബിൾ ട്രസ്റ്റിന്റെ സേവനപ്രവർത്തനങ്ങൾക്കുള്ള അംഗീകാരം കൂടിയായി ഈ ആദരവ്.
നവമാധ്യമ, സാംസ്കാരിക, സാമൂഹിക പ്രവർത്തകരുടെ സംഗമമായ ‘നിറവ് 2026’ വിവിധ മേഖലകളിലെ പ്രമുഖരുടെ സാന്നിധ്യംകൊണ്ട് ശ്രദ്ധേയമായി.
ആറ്റിങ്ങൽ എം.പി. അഡ്വ. അടൂർ പ്രകാശ് സംഗമം ഉദ്ഘാടനം ചെയ്തു.
നിറവ് ചീഫ് കോ-ഓർഡിനേറ്റർ രേഖ സ്നേഹപ്പച്ച സ്വാഗതം ആശംസിച്ചു.
സുമതി കുമാരൻ അധ്യക്ഷത വഹിച്ചു.ഇൻസ്റ്റഗ്രാമിൽ ആറു കോടിയിലേറെ പ്രേക്ഷകരുടെ ശ്രദ്ധ നേടിയ സോഷ്യൽ മീഡിയ ഇൻഫ്ലുവൻസറും ‘ദ ഹിസ്റ്ററി മാൻ ഓഫ് ഇന്ത്യ’ ബഹുമതി ജേതാവുമായ അഡ്വ. (ഡോ.) ജിതേഷ്ജി മുഖ്യാതിഥിയായിരുന്നു.
അഡ്വ. കെ.യു. ജനീഷ് കുമാർ, അഡ്വ. സി.വി. ശാന്തകുമാരി, അഡ്വ. പ്രമോദ് നാരായണൻ, പത്തനംതിട്ട ജില്ലാ പഞ്ചായത്ത് പ്രസിഡന്റ് റോബിൻ പീറ്റർ,
കോന്നി ബ്ലോക്ക് പഞ്ചായത്ത് പ്രസിഡന്റ് ദീനാമ്മ റോയി തുടങ്ങിയവർ വിശിഷ്ടാതിഥികളായി പങ്കെടുത്തു.
മുൻ ഫോക്‌ലോർ അക്കാദമി അംഗവും അധ്യാപകനും നാടൻപാട്ട് കലാകാരനുമായ അഡ്വ. സുരേഷ് സോമ,
ഫോക്‌ലോർ ഫെല്ലോഷിപ്പ് ജേതാവ് പ്രകാശ് വള്ളംകുളം, കോന്നി ഗ്രാമപഞ്ചായത്ത് അംഗം പ്രവീൺ പ്ലാവിളയിൽ എന്നിവർ ആശംസകൾ നേർന്നു.
നിറവ് കോ-ഓർഡിനേറ്റർ സൗമ്യ മനു കൃതജ്ഞത രേഖപ്പെടുത്തി.
സേവനവും പ്രചോദനവും ജീവിതവഴിയാക്കിയ സുജാത ഭാസ്‌കർ
അയ്മനം ഗ്രാമപഞ്ചായത്തിലെ മൂന്നാം വാർഡിൽ കുരിശുചിറ വീട്ടിൽ പരേതനായ ഭാസ്‌കരന്റെയും ലക്ഷ്മിയുടെയും മകളാണ് സുജാത ഭാസ്‌കർ. സഹോദരൻ അനിൽ, സഹോദരഭാര്യ മിനി, സഹോദരപുത്രൻ അമൽ എന്നിവരോടൊപ്പമാണ് താമസം.
2013 മുതൽ സർക്കാർ ഉദ്യോഗത്തിനൊപ്പം സാമൂഹിക സേവനരംഗത്തും സജീവമാണ് സുജാത.
ഭിന്നശേഷിക്കാർക്കും കിടപ്പുരോഗികൾക്കും വയോജനങ്ങൾക്കും നിരാലംബർക്കും സഹായമെത്തിക്കുന്ന പ്രവർത്തനങ്ങളാണ് സ്വസ്തി ചാരിറ്റബിൾ ട്രസ്റ്റിലൂടെ നടത്തിവരുന്നത്.
പ്രതിസന്ധികളെ അതിജീവിച്ച് മുന്നോട്ടുപോകാൻ മറ്റുള്ളവർക്ക് പ്രചോദനമാകുന്ന സന്ദേശങ്ങൾ പങ്കുവെക്കുന്നതും മോട്ടിവേഷൻ പ്രസംഗങ്ങളിലൂടെ
ആത്മവിശ്വാസം പകരുന്നതും അവരുടെ പ്രവർത്തനങ്ങളുടെ ഭാഗമാണ്.
നിറവ് 2026-ൽ ലഭിച്ച ഈ അംഗീകാരം കൂടുതൽ ആത്മവിശ്വാസത്തോടെ സേവനരംഗത്ത് മുന്നോട്ടുപോകാൻ പ്രചോദനമാകുമെന്ന് സുജാത ഭാസ്‌കർ പ്രതികരിച്ചു.
