കൊച്ചി: രാത്രിയെന്നോ പകലെന്നോ ഇല്ലാതെ ജോലി ചെയ്യുന്ന ലക്ഷക്കണക്കിന് സ്‌ത്രീകളുണ്ട്.
നഴ്‌സുമാർ, ഡോക്‌ടർമാർ, വിമാനത്തിലെ ജീവനക്കാർ, ഫാക്‌ടറി തൊഴിലാളികള്‍, സുരക്ഷാ ഉദ്യോഗസ്ഥർ, ഐടി പ്രൊഫഷണലുകള്‍, മാദ്ധ്യമപ്രവർത്തക‌ർ തുടങ്ങി ഭൂരിഭാഗം ജോലികള്‍ക്കും നൈറ്റ് ഷിഫ്‌റ്റ് ഉണ്ടാകാറുണ്ട്.
വർഷങ്ങളോളം ഇത്തരത്തില്‍ ജോലി ചെയ്യുന്നത് ഉറക്കക്കുറവിന് മാത്രമല്ല മറ്റ് പല ഗുരുതര ആരോഗ്യപ്രശ്‌നങ്ങള്‍ക്കും കാരണമാകുമെന്നാണ് വിദഗ്ദ്ധർ പറയുന്നത്.
'ബിഎംസി പബ്ലിക് ഹെല്‍ത്തി'ല്‍ പ്രസിദ്ധീകരിച്ച ഒരു ജേണലില്‍ ഇത് ശരിവയ്‌ക്കുന്ന തെളിവുകള്‍ കണ്ടെത്തിയിരിക്കുകയാണ്. വർഷങ്ങളോളം രാത്രി ഷിഫ്റ്റില് ജോലി ചെയ്യുന്ന സ്‌ത്രീകളില്‍ സ്‌തനാർബുദ സാദ്ധ്യത വർദ്ധിക്കുമെന്നാണ് കണ്ടെത്തല്‍.
രാത്രി ഷിഫ്റ്റില് ജോലി ചെയ്യുന്നത് സ്തനാർബുദത്തിന് കാരണമാകുന്നു എന്നല്ല ഇതിനർത്ഥം. രോഗം വരാനുള്ള കാരണങ്ങളില്‍ ഒന്ന് മാത്രമായി ഇതിനെ കണക്കാക്കണം.
സമയം തെറ്റിയുള്ള ഉറക്കം നമ്മുടെ ആന്തരിക ഘടികാരത്തിന്റെ പ്രവർത്തനത്തെ തെറ്റിക്കുന്നു. ഇത് ശരീരത്തിലെ ഭൂരിഭാഗം പ്രവർത്തനങ്ങളെയും ബാധിക്കുന്നു. അതിനാല്‍, രാത്രികാലത്ത് ജോലി ചെയ്യുന്ന സ്‌ത്രീകള്‍ എപ്പോഴും തങ്ങളുടെ ശരീരത്തെ നന്നായി ശ്രദ്ധിക്കണമെന്നാണ് വിദഗ്ദ്ധർ പറയുന്നത്.
എന്നാല്‍, പ്രായം, കുടുംബ ചരിത്രം, പ്രത്യുല്‍പാദന-ഹോർമോണ്‍ ഘടകങ്ങള്‍, ശരീരഭാരം, ജീവിതശൈലി എന്നിവയുള്‍പ്പെടെ ക്യാൻസർ വരാൻ കാരണമാകും. ഇതില്‍ ചെറിയൊരു സാദ്ധ്യത മാത്രമാണ് രാത്രി ഷിഫ്റ്റില് ജോലി ചെയ്യുന്നവർക്കുണ്ടാകുന്നത്. അതിനാല്‍ ഭയപ്പെടേണ്ട സാഹചര്യമില്ലെന്നും ആരോഗ്യവിദഗ്ദ്ധർ ചൂണ്ടിക്കാട്ടി.
