തുറവൂർ: വേമ്പനാട്ട് കായലിന് കുറുകെ ആലപ്പുഴ-കോട്ടയം ജില്ലകളെ ബന്ധിപ്പിക്കുന്ന മാക്കേക്കടവ്-നേരേകടവ് പാലം പത്തു വർഷത്തോളം നീണ്ട കാത്തിരിപ്പിനൊടുവില്‍ യാഥാർത്ഥ്യമാകുന്നു.18ന് മുഖ്യമന്ത്രി വി.ഡി സതീശൻ ഉദ്ഘാടനം ചെയ്യും, ഒരുക്കങ്ങള്‍ പുരോഗമിക്കുന്നു.
പാലത്തിന്റെയും അപ്രോച്ച്‌ റോഡുകളുടെയും ടാറിംഗ് പൂർത്തിയായി. റോഡ് മാർക്കിംഗ്, കൈവരികള്‍, ലൈറ്റിംഗ്, പെയിന്റിംഗ്, ഇലക്‌ട്രിക് കേബിള്‍ സ്ഥാപിക്കല്‍ തുടങ്ങിയ പ്രധാന പ്രവൃത്തികളെല്ലാം പൂർത്തിയായിട്ടുണ്ട്. തെരുവു വിളക്കുകള്‍ക്ക് വൈദ്യുതി കണക്‌ഷൻ നല്‍കുന്ന നടപടികള്‍ പുരോഗമിക്കുന്നു.
സ്ഥലം എം.എല്‍.എയും ഡെപ്യൂട്ടി സ്പീക്കറുമായ ഷാനിമോള്‍ ഉസ്മാൻ പാലം സന്ദർശിച്ച്‌ നിർമ്മാണ പുരോഗതി വിലയിരുത്തിയതിനെ തുടർന്ന് ശേഷിച്ച പ്രവൃത്തികള്‍ ദ്രുതഗതിയില്‍ പൂർത്തിയാക്കുകയായിരുന്നു. സുരക്ഷാരേഖ വരയ്ക്കല്‍, സുരക്ഷാ ഉപകരണങ്ങള്‍ സ്ഥാപിക്കല്‍ തുടങ്ങിയ അവസാനഘട്ട ജോലികളാണ് ശേഷിക്കുന്നത്.
പാലം ഇറങ്ങുന്ന നേരേകടവ് ഭാഗത്തെ റോഡ് വികസനത്തിന് സംസ്ഥാന ബഡ്ജറ്റില്‍ 10 കോടി രൂപ ഉള്‍പ്പെടുത്തിയിട്ടുണ്ട്. തുക ലഭ്യമാകുന്ന മുറയ്ക്ക് റോഡുകളും കലുങ്കുകളും നവീകരിക്കും.
പാലത്തിലൂടെ ഭൂഗർഭ കേബിള്‍ സ്ഥാപിച്ച്‌ തൈക്കാട്ടുശേരി സബ്‌സ്റ്റേഷനില്‍ നിന്ന് വൈക്കം, ചെമ്പ് വൈദ്യുതി സെക്‌ഷനുകളിലേക്ക് അധിക വൈദ്യുതി എത്തിക്കുന്നതിനുള്ള നടപടികളും പൂർത്തിയായി.112 കോടി രൂപ ചെലവില്‍ നിർമ്മിച്ച പാലത്തിന് ഏകദേശം 800 മീറ്റർ നീളവും ഇരുവശങ്ങളിലെയും നടപ്പാതകള്‍ ഉള്‍പ്പെടെ 11 മീറ്റർ വീതിയുമുണ്ട്.
