കൊച്ചി : നെടുമ്പാശ്ശേരി വാഹനാപകട കേസിൽ പ്രതി സുഹൈലിനെ വിവിധ സ്ഥലങ്ങളിൽ എത്തിച്ച് തെളിവെടുപ്പ് നടത്തി പൊലീസ്. പ്രതി സുഹൈലിനെ അപകടം നടന്ന എയർപോർട്ട് റോഡിലും നെടുമ്പാശ്ശേരിയിലെ ബാറിലും എത്തിച്ചാണ് തെളിവെടുപ്പ് നടത്തിയത്.
അതേസമയം പ്രതികളുടെ കസ്റ്റഡി കാലാവധി ഇന്ന് അവസാനിക്കും. ജാമ്യ അപേക്ഷ നാളെ പരിഗണിക്കും. രണ്ടുദിവസത്തെ കസ്റ്റഡിയാണ് അങ്കമാലി മജിസ്ട്രേറ്റ് കോടതി ഇന്നലെ അനുവദിച്ചത്. കനത്ത പൊലീസ് സുരക്ഷയിലായിരുന്നു തെളിവെടുപ്പ്. ഇന്നലെ പ്രതികളുടെ ഫിംഗർ പ്രിന്റ് പരിശോധന അടക്കമുള്ള കാര്യങ്ങൾക്ക് പെരുമ്പാവൂർ പോലീസ് സ്റ്റേഷനിൽ എത്തിച്ചിരുന്നു. തുടർ സമരങ്ങളും പ്രതിഷേധങ്ങളും നടക്കുന്നതിനാൽ ക്രമസമാധാന പ്രശ്നങ്ങൾ കണക്കിലെടുത്ത് ഇന്നലെ തെളിവെടുപ്പ് നടത്തിയിരുന്നില്ല.
നെടുമ്പാശ്ശേരി സർക്കിൾ ഇൻസ്പെക്ടറുടെ നേതൃത്വത്തിൽ നടന്നിരുന്ന അന്വേഷണം നിലവിൽ ആലുവ ഡിവൈഎസ്പിക്ക് ആണ് ചുമതല. കേസിൽ വേണ്ടിവന്നാൽ സ്പെഷ്യൽ പബ്ലിക് പ്രോസിക്യൂട്ടറെ നിയമിക്കാനാണ് സർക്കാർ തീരുമാനം.
