തിരുവനന്തപുരം: അന്തരിച്ച സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ ഭാര്യ വിനോദിനി ബാലകൃഷ്ണൻ വാർത്താസമ്മേളനത്തില്‍ പറഞ്ഞ കാര്യം കേരളം ചർച്ച ചെയ്യണമെന്ന് ബി.ജെ.പി എം.എല്‍.എ ബി.ബി.
ഗോപകുമാർ. സി.എം.ആർ.എല്‍ മാസപ്പടി കേസില്‍ പിണറായി വിജയൻ പാർട്ടിയെ മറയാക്കുന്നു എന്നാണ് ഭംഗ്യന്തരേണ വിനോദിനി സൂചിപ്പിച്ചതെന്ന് അദ്ദേഹം ആരോപിച്ചു. കേസുമായി ബന്ധപ്പെട്ടുകൊണ്ട് സി.പി.എം മുൻ സംസ്ഥാന സെക്രട്ടറിയും മുൻ അഭ്യന്തര വകുപ്പ് മന്ത്രിയുമായ അന്തരിച്ച കൊടിയേരി ബാലകൃഷ്ണന്റെ സഹധർമ്മിണി വിനോദിനി ഒരു പത്രസമ്മേളനത്തില്‍ പറഞ്ഞ ഒരു വാചകം നമ്മള്‍ ശ്രദ്ധിക്കേണ്ടതുണ്ട്.
സംസ്ഥാന സെക്രട്ടറി എന്ന രീതിയിലോ മുൻ അഭ്യന്തര വകുപ്പ് മന്ത്രി എന്ന രീതിയിലോ ഞാനോ എന്റെ ഭർത്താവോ എന്റെ കുടുംബമോ (ബിനീഷ് കോടിയേരിയുടെ) കേസിനു വേണ്ടി പാർട്ടിയെ മറയാക്കിയിട്ടില്ല എന്നാണ് അവർ പറഞ്ഞത്. ആ പ്രസ്താവന നമ്മുടെ മുന്നില്‍ ഉണ്ട്. അങ്ങനെയാണെങ്കില്‍ സിഎംആർഎല്‍ കേസുമായി ബന്ധപ്പെട്ടുകൊണ്ട് പിണറായി വിജയൻ പാർട്ടിയെ മറയാക്കുന്നു എന്നാണ് ഭംഗ്യന്തരേണ വിനോദിനി സൂചിപ്പിച്ചത്. അത് കേരളം ചർച്ച ചെയ്യപ്പെടേണ്ട ഒരു കാര്യമാണ്. സി.പി.എം മുൻ സംസ്ഥാന സെക്രട്ടറിക്ക്, മുൻ ആഭ്യന്തര വകുപ്പ് മന്ത്രിക്ക് ലഭിക്കാത്ത പരിഗണന പാർട്ടിയില്‍ നിന്ന് എന്തുകൊണ്ട് പിണറായിക്ക് കിട്ടുന്നു എന്ന ചോദ്യവും കൂടിയാണ് ഉന്നയിക്കപ്പെടേണ്ടത്. ഇത്തരം കാര്യങ്ങള്‍ കേരളത്തിലെ പൊതുസമൂഹം ചിന്തിക്കുകയും ചർച്ച ചെയ്യുകയും വേണം' -അദ്ദേഹം പറഞ്ഞു.
കാഞ്ചനയ്ക്ക് മൊയ്തീനോടുള്ള സ്നേഹത്തേക്കാള്‍ വലുതാണ് വിഡി സതീശിന് പിണറായി വിജയനോടുള്ള സ്നേഹമെന്നും ബി.ബി. ഗോപകുമാർ പറഞ്ഞു. എങ്ങനെയെങ്കിലും പിണറായിക്കെതിരെ എഫ്‌ഐആർ ഒഴിവാക്കുക, കേസ് ഒഴിവാക്കുക എന്നതാണ് വിഡി സതീശൻ ഗവണ്‍മെന്റിന്റെ നയം. ഇപ്പോഴത്തെ അവരുടെ അടുപ്പവും സ്നേഹവും ഒക്കെ കണ്ടാല്‍ നാളെ വീണ്ടും വക്കീല്‍ കുപ്പായമിട്ട് കേരള ഹൈക്കോടതിയില്‍ പിണറായിക്ക് വേണ്ടി വി.ഡി. സതീശൻ ഹാജരാകുന്ന രീതിയിലേക്കാണ് കാര്യങ്ങള്‍ പോകുന്നതെന്നും അദ്ദേഹം പറഞ്ഞു.
