ലാപ്ടോപ്പും സ്മാര്ട്ട്ഫോണുകളും മണിക്കൂറുകളോളം ഉപയോഗിക്കുന്നവരാണോ നിങ്ങൾ.സഹിക്കാൻ കഴിയാത്ത കഴുത്തുവേദനയാണോ പ്രശ്നം.
തലകുനിച്ച് ഡിജിറ്റല് ഉപകരണങ്ങളിലേക്ക് നോക്കിയിരിക്കുന്നത് ശരീരത്തിന് വലിയ തോതിലുള്ള ആരോഗ്യപ്രശ്നങ്ങളാണ് സൃഷ്ടിക്കുന്നത്.
സമീപകാലത്ത് വിദ്യാര്ത്ഥികള്ക്കിടയില് നടത്തിയ വിവിധ പഠനങ്ങളും സര്വേകളും ഈ ആശങ്ക ശരിവെക്കുന്നുമുണ്ട്. കഴിഞ്ഞ ഒരാഴ്ചയ്ക്കിടെ 52 ശതമാനത്തിലധികം പേര്ക്കും കഴുത്തുവേദന അനുഭവപ്പെട്ടതായി പഠനങ്ങള് ചൂണ്ടിക്കാണിക്കുന്നു.
സ്മാര്ട്ട്ഫോണുകളെ അപേക്ഷിച്ച് ലാപ്ടോപ്പ് ഉപയോഗിക്കുന്നവരിലാണ് ഇത്തരം പ്രശ്നങ്ങള് 2.7 മടങ്ങ് കൂടുതലായി കണ്ടുവരുന്നത്.
സോഷ്യല് മീഡിയയുടെ അമിതമായ ഉപയോഗവും ഇതിന് ആക്കം കൂട്ടുന്നുണ്ട്. യഥാര്ത്ഥ വില്ലന് ലാപ്ടോപ്പോ ഫോണോ അല്ല,
മറിച്ച് നമ്മള് അവ ഉപയോഗിക്കുന്ന രീതിയിലെ തെറ്റായ ശീലങ്ങളാണെന്ന് വിദഗ്ധര് ചൂണ്ടിക്കാണിക്കുന്നു. ഒരേ ഇരുപ്പില് മണിക്കൂറുകളോളം സ്ക്രീനിലേക്ക് കുനിഞ്ഞിരിക്കുന്നത് ശരീരത്തിന്റെ സ്വാഭാവിക ഘടനയെത്തന്നെ ബാധിക്കുന്നു.
ഫോണുകളിലേക്കോ ലാപ്ടോപ്പുകളിലേക്കോ ദീര്ഘനേരം തുടര്ച്ചയായി താഴേക്ക് നോക്കിയിരിക്കുമ്പോള് കഴുത്തിലും പുറത്തിന്റെ മുകള്ഭാഗത്തുമുണ്ടാകുന്ന അസ്വസ്ഥതകളെയാണ് 'ടെക് നെക്ക്' എന്ന് വിശേഷിപ്പിക്കുന്നത്.
തല മുന്നിലേക്കും താഴേക്കും കുനിഞ്ഞിരിക്കുമ്പോള് കഴുത്തിലെ പേശികള്ക്കും നട്ടെല്ലിന്റെ മുകള്ഭാഗത്തിനും (Cervical spine) വലിയ തോതിലുള്ള മര്ദ്ദം നേരിടേണ്ടി വരുന്നു.
പ്രധാന ലക്ഷണങ്ങള്
കഴുത്തിലും തോളിലുമുള്ള വേദന- കഴുത്തിന്റെ പിന്ഭാഗത്തും തോളുകളിലും പേശീവേദനയും കടുത്ത മുറുക്കവും അനുഭവപ്പെടുക.
ചലന ബുദ്ധിമുട്ട്- തല തിരിക്കാന് ബുദ്ധിമുട്ടും കഴുത്തിന് കാഠിന്യവും തോന്നുക.
തലവേദന- തലയോട്ടിക്ക് താഴെയായി ആരംഭിച്ച് മുകളിലേക്ക് പടരുന്ന തരത്തിലുള്ള തലവേദന.
തോളെല്ലുകള്ക്കിടയിലായി നിരന്തരമായ അസ്വസ്ഥതയും വേദനയും അനുഭവപ്പെടുക.
പ്രതിരോധിക്കാന് ശ്രദ്ധിക്കേണ്ട കാര്യങ്ങള്
സ്ക്രീന് ലെവല് ക്രമീകരിക്കുക- ലാപ്ടോപ്പ് അല്ലെങ്കില് ഫോണ് ഉപയോഗിക്കുമ്പോള് സ്ക്രീന് കണ്ണിന്റെ കൃത്യമായ നിരപ്പില് (Eye level) വരുന്ന രീതിയില് വെക്കുക.
ശരിയായ ഇരിപ്പ് രീതി: നടുവിനും കൈകള്ക്കും ആവശ്യമായ താങ്ങ് (Support) ഉറപ്പാക്കിക്കൊണ്ട് നിവര്ന്ന് ഇരുന്നു ജോലി ചെയ്യുക.
ഇടവേളകള് എടുക്കുക- തുടര്ച്ചയായി ഇരുന്നു ജോലി ചെയ്യുന്നവര് ഓരോ 30-40 മിനിറ്റ് കൂടുമ്പോഴും എഴുന്നേറ്റ് അല്പം നടക്കുകയോ സ്ട്രെച്ചിങ് ചെയ്യുകയോ ചെയ്യുക.
