കോഴിക്കോട്: നടുവണ്ണൂര് കുരുടിമുക്കില് റോഡ് മുറിച്ചുകടക്കുന്നതിനിടെ ട്രാവലര് ഇടിച്ചു യുവതിക്ക് ഗുരുതരമായി പരിക്കേറ്റു. പറമ്പത്ത് ഏലത്തില് സുബൈദയ്ക്കാണ് സാരമായി പരിക്കേറ്റത്.
കുരുടിമുക്കിലെ സീബ്രാലൈനിന് സമീപത്തുനിന്നും റോഡ് മുറിച്ചു കടക്കുന്നതിനിടെയാണ് വാഹനം യുവതിയെ ഇടിച്ചത്.
ഇടിയുടെ ആഘാതത്തില് റോഡിലേക്ക് തെറിച്ചുവീണ സുബൈദയുടെ കാലിലൂടെ വാഹനത്തിന്റെ മുന്ചക്രം കയറിയിറങ്ങുകയായിരുന്നു.
അപകടസ്ഥലത്തിന് തൊട്ടടുത്ത് സീബ്രാലൈനിന് മുകളില് നിയമവിരുദ്ധമായി സ്വകാര്യ ബസ് പാര്ക്ക് ചെയ്തതും ട്രാവലര് ഡ്രൈവറുടെ അശ്രദ്ധയുമാണ് അപകടത്തിന് കാരണമെന്ന് ദൃക്സാക്ഷികള് വ്യക്തമാക്കി.
അപകടം നടന്നയുടനെ നാട്ടുകാരും വ്യാപാരികളും ചേര്ന്ന് യുവതിയെ ആശുപത്രിയിലെത്തിച്ചു.
നിലവില് കോഴിക്കോട് മെഡിക്കല് കോളജ് ആശുപത്രിയില് ചികിത്സയില് കഴിയുന്ന ഇവരുടെ പരിക്കുകള് ഗുരുതരമാണ്. സംഭവത്തിന്റെ സി.സി.ടി.വി ദൃശ്യങ്ങള് പുറത്തുവന്നിട്ടുണ്ട്.
