തിരുവനന്തപുരം: ജനകീയ ആരോഗ്യമേഖലയെ തകർക്കുന്നതാണ് യുഡിഎഫ് നയമെന്നും ഡോക്ടർമാരെ തലങ്ങും വിലങ്ങും സ്ഥലം മാറ്റുകയാണെന്നും സിപിഎം സംസ്ഥാന സെക്രട്ടറി എം വി ഗോവിന്ദൻ.
എല്ലാം സ്വകാര്യവല്‍ക്കരിക്കുക എന്ന അജണ്ട ആരോഗ്യ മേഖലയില്‍ നടപ്പിലാക്കാനാണ് ശ്രമം. എല്ലാം സ്വകാര്യവല്‍ക്കരിക്കുമെന്ന അജണ്ടയാണ് സർക്കാരിനുള്ളത്.
ടാസ്ക് ഫോഴ്സ് അംഗങ്ങളില്‍ വൻ അഴിമതിക്കാരാണുള്ളത്. എന്തിനാണ് ഇവരെ വിദഗ്ധരായി ഉള്‍പ്പെടുത്തിയത്. മുൻ ആരോഗ്യ മന്ത്രിമാരെ വ്യക്തിപരമായി അധിക്ഷേപിക്കുകയാണ് കെ മുരളീധരനെന്നും എം വി ഗോവിന്ദൻ പറഞ്ഞു.
എസ്‌എംഎ മരുന്ന് വിവാദത്തില്‍ രക്ഷിതാക്കളുടെ ആശങ്ക പരിഹരിക്കണം. ആരോഗ്യമന്ത്രി കൃത്യമായി മറുപടി പറയുന്നില്ല. ആരോഗ്യമന്ത്രി ഉത്തരംമുട്ടുമ്പോള്‍ കൊഞ്ഞനം കുത്തുകയാണ്.
മറുപടി ഇല്ലാത്തതിനാലാണ് അവരെ ചീത്ത പറഞ്ഞത്. ഉപയോഗിച്ച പദം ഞാനിവിടെ പറയുന്നില്ല. വൃത്തികെട്ട രീതിയിലാണ് ആരോഗ്യമന്ത്രി നിലപാടെടുത്തതെന്നും എം വി ഗോവിന്ദൻ പറഞ്ഞു.
യുഡിഎഫ് സർക്കാരിൻ്റേത് കേന്ദ്ര സർക്കാരിൻ്റേതിന് സമാനമായ കോർപ്പറേറ്റ് ഹിന്ദുത്വ നയമാണ്. കേന്ദ്ര സർക്കാരിൻ്റെ സാമ്പത്തിക നയം ഇവിടെയും ആവർത്തിക്കുന്നുവെന്നും കിഫ്ബിയെ തകർക്കാൻ ബോധപൂവ്വം നീക്കം നടക്കുന്നതായും എം വി ഗോവിന്ദൻ പറഞ്ഞു.
കിഫ്ബിയെ തകർത്ത് കേരള വികസനത്തെ ദുർബലപ്പെടുത്താനാണ് കേന്ദ്ര ഏജൻസികള്‍ ശ്രമിച്ചത്. അതിനെ അതിജീവിച്ചാണ് സർക്കാർ മുന്നോട്ട് പോയത്. കേന്ദ്രസർക്കാരിൻ്റെ താല്‍പര്യമാണ് ഇപ്പോള്‍ യുഡിഎഫ് സർക്കാർ നിർവഹിക്കുന്നതെന്നും എം വി ഗോവിന്ദൻ പറഞ്ഞു.
