പത്തനംതിട്ട : എംവിഡി ഉദ്യോഗസ്ഥരുടെ സസ്പെൻഷനിൽ സംസ്ഥാന സർക്കാരിനോട് വിശദീകരണം തേടി ഹൈക്കോടതി. ഓഫ് റോഡ് വാഹനത്തിൽ അനധികൃതമായി ഘടിപ്പിച്ച ലൈറ്റുകൾക്ക് പിഴ ചുമത്തിയ ഉദ്യോഗസ്ഥരെ ഗതാഗത വകുപ്പ് സസ്പെൻഡ് ചെയ്യുകയും പിന്നീട് തിരിച്ചെടുക്കുകയും ചെയ്തിരുന്നു. ഈ സംഭവത്തിലാണ് ഇപ്പോൾ ഹൈക്കോടതി വിശദീകരണം തേടിയത്.
പത്തനംതിട്ടയിൽ പ്രളയ ദുരിതാശ്വാസത്തിൽ പങ്കെടുത്ത വാഹനത്തിന് പിഴ ഇട്ടെന്ന പേരിൽ ആയിരുന്നു നടപടി. അനധികൃത ലൈറ്റുകൾക്ക് പിഴ ഈടാക്കണമെന്ന് നേരത്തെ ഹൈക്കോടതി ഉത്തരവിട്ടിരുന്നു. ഈ സാഹചര്യത്തിൽ ഉദ്യോഗസ്ഥരെ സസ്പെൻഡ് ചെയ്ത കാര്യം വിശദീകരിക്കാനാണ് നിർദേശം.
സ്വമേധയാ എടുത്ത കേസിലാണ് കോടതി ഉത്തരവ്. കേസ് മറ്റന്നാൾ വീണ്ടും പരിഗണിക്കും. അനധികൃത ലൈറ്റുകൾ ഉൾപ്പെടെയുള്ള മോഡിഫിക്കേഷനുകളിൽ കേന്ദ്രസർക്കാരിനോടും കോടതി വിശദീകരണം തേടിയിട്ടുണ്ട്.
