കൊച്ചി: മുട്ടിൽ മരംമുറിയുമായി ബന്ധപ്പെട്ട വഞ്ചന കേസിൽ പ്രതികളായ റോജി അഗസ്റ്റിൻ, ആന്റോ അഗസ്റ്റിൻ, ജോസുകുട്ടി അഗസ്റ്റിൻ എന്നിവർ ഇന്ന് കോടതിയിൽ ഹാജരായില്ല. ഹാജരാകുന്നതിന് കൂടുതൽ സമയം അനുവദിക്കണമെന്നാവശ്യപ്പെട്ട് പ്രതികൾ അപേക്ഷ നൽകി. വനംവകുപ്പിന്റെ പാസ് ഉണ്ടെന്ന് തെറ്റിദ്ധരിപ്പിച്ച് അനധികൃതമായി മുറിച്ച മരത്തടികൾ വിൽപ്പന നടത്തിയെന്ന പരാതിയിലാണ് കേസ്. മരം വാങ്ങിയ എം.എം. അലിയാറാണ് പരാതിക്കാരൻ.
2021 ജൂലൈ 13നാണ് കേസിന്റെ തുടക്കം. പല ഗഡുക്കളായി മര വ്യാപാരിയിൽനിന്ന് മുൻകൂർ തുക കൈപ്പറ്റിയ പ്രതികൾ, നിയമവിരുദ്ധമായി മുറിച്ച 54 കഷണം തടികളാണ് കൈമാറിയതെന്നാണ് കേസ്. ഇതേതുടർന്ന് വഞ്ചനാക്കുറ്റം നിലനിൽക്കില്ലെന്ന പ്രതികളുടെ വാദം ഹൈക്കോടതി നേരത്തെ തള്ളിയിരുന്നു. അഗസ്റ്റിൻ സഹോദരന്മാരുടെ വിടുതൽ ഹർജികളും പിന്നീട് തള്ളിയതോടെ കേസിലെ തുടർനടപടികൾക്ക് വഴിയൊരുങ്ങി.
മുട്ടിൽ മരംമുറിയുമായി ബന്ധപ്പെട്ട് അഗസ്റ്റിൻ സഹോദരന്മാർ പ്രതികളായ 36 കേസുകളിൽ കുറ്റപത്രം സമർപ്പിച്ചിട്ടുണ്ട്. ഇതിനിടെയാണ് വഞ്ചനാക്കേസിലെ ഇന്നത്തെ നടപടിയിൽ പ്രതികൾ ഹാജരാകാതെ സമയം നീട്ടി നൽകണമെന്ന അപേക്ഷ നൽകിയത്. അപേക്ഷയിൽ കോടതി സ്വീകരിക്കുന്ന നിലപാട് കേസിന്റെ തുടർനടപടികളിൽ നിർണായകമാകും.
