മുംബൈ: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിൻ്റെ രാജി ആവശ്യപ്പെട്ട് ഡൽഹിയില്‍ കോക്റോച്ച്‌ ജനത പാർട്ടി (സിജെപി) യുടെ നേതൃത്വത്തില്‍ നടന്ന പ്രതിഷേധത്തിന് ഐക്യദാർഢ്യം അറിയിച്ച്‌ മുംബൈയിൽ നടന്ന സിജെപി ഐക്യദാർഢ്യ സംഗമത്തില്‍ കേസെടുത്ത് മുംബൈ പൊലീസ്.
ശനിയാഴ്ച ഉച്ചകഴിഞ്ഞ് മുംബൈയിലെ ക്രാന്തി മൈതാനത്ത് നിശ്ചയിച്ച സിജെപി ഐക്യദാർഢ്യ സംഗമത്തില്‍ തുഷാർ ഗാന്ധി, നടൻ ഇമ്രാൻ ഖാൻ തുടങ്ങി 12 പേർക്കെതിരെയാണ് പൊലീസ് കേസെടുത്തത്.
കണ്ടാലറിയാവുന്ന 350 പേർക്കെതിരെയും കേസെടുത്തു. സംഭവത്തില്‍ 600 പേരെ പൊലീസ് കസ്റ്റഡിയിലെടുത്തിരുന്നു.
മഹാത്മാ ഗാന്ധിയുടെ കൊച്ചുമകൻ കൂടിയായ തുഷാർ ഗാന്ധി, നടൻ ഇമ്രാൻ ഖാൻ, ശിവസേന (ഉദ്ധവ് താക്കറെ) എംഎല്‍എ വരുണ്‍ സർദേശായി അടക്കമുള്ളർ പൊലീസിൻ്റെ കസ്റ്റഡിയിലായിരുന്നു.
ഡൽഹിയിലെ സിജെപി പ്രതിഷേധത്തിന് ഐക്യാദാർഢ്യം പ്രഖ്യാപിച്ച്‌ തുഷാർ ഗാന്ധിയുടെ നേതൃത്വത്തിലുള്ള 'ഹം ഭാരത് കെ ലോഗ്' എന്ന സംഘടനയുടെ ആണ് ഐക്യദാർഢ്യ സംഗമം ആസൂത്രണം ചെയ്തത്. ക്രാന്തി മൈതാനത്തിലേക്ക് നീളുന്ന റോഡ് പൊലീസ് ബാരിക്കേഡ് വെച്ച്‌ അടച്ചിരുന്നു.
ഇതോടെ മൈതാനത്തിന് പുറത്ത് പ്രതിഷേധം സംഘടിപ്പിച്ചതോടെ പൊലീസ് ഇടപെടുകയും പ്രതിഷേധക്കാരെ കസ്റ്റഡിയിലെടുത്ത് നീക്കുകയുമായിരുന്നു. കസ്റ്റഡിയിലായ പ്രതിഷേധക്കാർ, 'ജയ് ഭീം', 'ഇൻക്വിലാബ് സിന്ദാബാദ്' മുഴക്കുകയും ഗ്യാനേഷ് കുമാറിന്റെ രാജി ആവശ്യപ്പെടുകയും ചെയ്തു.
