ഡല്‍ഹി: ഫ്‌ളൈ ദുബായ് വിമാനത്തില്‍ സഹ പൈലറ്റിന്റെ ആക്രമണത്തില്‍ പരുക്കേറ്റ ക്യാപറ്റന്‍ സ്മിത് മച്ഛാറുമായി ഫോണില്‍ സംസാരിച്ച് പ്രധാനമന്ത്രി നരേന്ദ്രമോദി. സ്വന്തം ജീവന്‍ കണക്കാക്കാതെ മറ്റുള്ളവരുടെ ജീവന്‍ രക്ഷിച്ചതില്‍ സ്മിത്തിനെ അഭിനന്ദിച്ച മോദി ക്യാപ്റ്റന്‍ ധീരതയുടെ ഉത്തമ മാതൃകയാണെന്ന് പറഞ്ഞു.
രാജ്യം മുഴുവന്‍ അദ്ദേഹത്തിന്റെ രോഗശാന്തിക്കായി പ്രാര്‍ത്ഥിക്കുന്നുണ്ടെന്ന് പ്രധാനമന്ത്രി മോദി പറഞ്ഞു. നമ്മള്‍ ജീവന്‍ എടുക്കുന്നവരല്ല, മറിച്ച് മറ്റുള്ളവരെ രക്ഷിക്കാന്‍ സ്വന്തം ജീവന്‍ പണയപ്പെടുത്താന്‍ തയ്യാറുള്ളവരാണെന്ന് ഇന്ത്യക്കാര്‍ക്ക് ഇപ്പോള്‍ അഭിമാനത്തോടെ പറയാന്‍ കഴിയുമെന്നും മോദി പറഞ്ഞു.
സഹപൈലറ്റിന്റെ ആക്രമണത്തില്‍ പരിക്കേറ്റ സ്മിത്ത് മച്ചാര്‍ ഇപ്പോള്‍ അബുദാബിയിലെ ആശുപത്രിയില്‍ ചികിത്സയിലാണ്. സൗദി അറേബ്യയിലെ തബൂക്കിലെ ഒരു ആശുപത്രിയില്‍ പ്രാഥമിക ചികിത്സ നല്‍കിയ ശേഷം അദ്ദേഹത്തെ അബുദാബിയിലേക്ക് മാറ്റുകയായിരുന്നു.
ദുബായില്‍ നിന്ന് ടെല്‍ അവീവിലേക്ക് പോകുകയായിരുന്ന വിമാനത്തിലുണ്ടായ അപ്രതീക്ഷിതമായ സംഘർഷത്തിലാണ് ഇന്ത്യന്‍ വംശജനായ ക്യാപ്റ്റന്‍ സ്മിത് മച്ചാറിന് ഗുരുതരമായി പരിക്കേറ്റത്. കോക്ക്പിറ്റിലുണ്ടായ സംഘര്‍ഷത്തിനിടെ സ്മിത് മച്ചാറിന് ഒമാനി സഹപൈലറ്റില്‍ നിന്ന് കുത്തേല്‍ക്കുകയായിരുന്നു. ഗുരുതരമായി പരിക്കേറ്റിരുന്നെങ്കിലും അദ്ദേഹം പ്രതിരോധ ശ്രമം തുടര്‍ന്നിരുന്നു. പരിക്കുകള്‍ക്കിടയിലും കോക്ക്പിറ്റ് വാതില്‍ തുറക്കാന്‍ മച്ചാറിന് സാധിച്ചു. ഇത് യാത്രക്കാര്‍ക്കും ജീവനക്കാര്‍ക്കും ഇടപെടാന്‍ അവസരമൊരുക്കി. തുടര്‍ന്ന് വിമാനം വഴിതിരിച്ചുവിടുകയും സൗദി അറേബ്യയിലെ തബൂക്കില്‍ സുരക്ഷിതമായി ഇറങ്ങുകയും ചെയ്തു. ക്യാപ്റ്റനെ ഉടന്‍ തന്നെ തബൂക്കിലെ ആശുപത്രിയിലേക്ക് മാറ്റുകയായിരുന്നു.
