ന്യൂഡൽഹി:പ്രായപൂർത്തിയാകാത്ത കുട്ടികളുടെ സോഷ്യൽ മീഡിയ ഉപയോഗം വർദ്ധിച്ചുവരുന്ന സാഹചര്യത്തിൽ കർശനമായ നിയന്ത്രണങ്ങൾ കൊണ്ടുവരണമെന്ന നിർണായക നിർദേശവുമായി സുപ്രീം കോടതി രംഗത്ത്. കുട്ടികൾക്ക് സ്വതന്ത്രമായി സോഷ്യൽ മീഡിയ അക്കൗണ്ടുകൾ അനുവദിക്കുന്നത് തടയാൻ കേന്ദ്ര സർക്കാർ അടിയന്തരമായി ഇടപെടണമെന്നും നിലവിലുള്ള ഐടി നിയമങ്ങളിൽ ആവശ്യമായ ഭേദഗതികൾ വരുത്തണമെന്നും കോടതി ആവശ്യപ്പെട്ടു.
നിയമസാധുത ചോദ്യം ചെയ്ത് കോടതി
'ജസ്റ്റ് റൈറ്റ്സ് ഫോർ ചിൽഡ്രൻ അലയൻസ്' എന്ന എൻജിഒ സമർപ്പിച്ച പൊതുതാൽപ്പര്യ ഹർജി പരിഗണിച്ചുകൊണ്ടാണ് കോടതിയുടെ ഈ നിർണ്ണായക ഇടപെടൽ. ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ചാണ് ഈ വിഷയം പരിശോധിച്ചത്. ഇന്ത്യൻ കരാർ നിയമപ്രകാരം പ്രായപൂർത്തിയാകാത്ത കുട്ടികൾക്ക് കരാറുകളിൽ ഏർപ്പെടാൻ നിയമപരമായ യോഗ്യതയില്ലെന്ന് കോടതി ചൂണ്ടിക്കാട്ടി. സോഷ്യൽ മീഡിയ പ്ലാറ്റ്‌ഫോമുകളിൽ അക്കൗണ്ട് തുടങ്ങുമ്പോൾ 'ടേംസ് ആൻഡ് കണ്ടീഷൻസ്' അംഗീകരിക്കുന്നത് ഒരു കരാറാണെന്നും, അതുകൊണ്ടുതന്നെ 12-ഉം 15-ഉം വയസ്സുള്ള കുട്ടികൾ ഉണ്ടാക്കുന്ന ഇത്തരം ഡിജിറ്റൽ അക്കൗണ്ടുകൾ നിയമവിരുദ്ധമാണെന്നും കോടതി നിരീക്ഷിച്ചു.
മാതാപിതാക്കളുടെ സമ്മതവും
ഇ-കെവൈസിയും
18 വയസ്സിന് താഴെയുള്ള കുട്ടികൾ സോഷ്യൽ മീഡിയ ഉപയോഗിക്കുമ്പോൾ മാതാപിതാക്കളുടെയോ രക്ഷിതാക്കളുടെയോ കൃത്യമായ സമ്മതം ഉറപ്പാക്കുന്ന സംവിധാനം വേണമെന്നാണ് ഹർജിയിലെ പ്രധാന ആവശ്യം. ഇതിനായി തിരിച്ചറിയൽ രേഖകൾ ഉപയോഗിച്ചുള്ള പ്രായപരിശോധനയും ഇ-കെവൈസി (e-KYC) സംവിധാനവും നിർബന്ധമാക്കണം. ഓൺലൈൻ വഴിയുള്ള ലൈംഗിക ചൂഷണം, സൈബർ ബുല്ലിയിംഗ്, കുട്ടികളുടെ വ്യക്തിഗത വിവരങ്ങൾ ചോർത്തൽ എന്നിവയിൽ നിന്ന് ഇവരെ സംരക്ഷിക്കാൻ നിലവിലെ സംവിധാനങ്ങൾ അപര്യാപ്തമാണെന്നും ഹർജിയിൽ വ്യക്തമാക്കുന്നു.
ഡിജിറ്റൽ പേഴ്‌സണൽ ഡാറ്റാ പ്രൊട്ടക്ഷൻ നിയമത്തിലെ വ്യവസ്ഥകൾ കേന്ദ്ര സർക്കാർ പരിശോധിച്ച് വരികയാണെന്ന് സോളിസിറ്റർ ജനറൽ കോടതിയെ അറിയിച്ചു. ഐടി നിയമത്തിലെ ഇന്റർമീഡിയറി ചട്ടങ്ങൾ ഭേദഗതി ചെയ്ത് ശക്തമായ സുരക്ഷാ 'ഫയർവാളുകൾ' ഒരുക്കാൻ നിർദേശിച്ച സുപ്രീം കോടതി കേസ് അടുത്ത മാസം 13-ലേക്ക് മാറ്റിവെച്ചു
