കാസർകോട്: അതിഥി തൊഴിലാളിക്ക് കളഞ്ഞുകിട്ടിയ മൊബൈല്‍ ഫോണ്‍ പൊലീസ് സ്റ്റേഷനില്‍ ഏല്‍പ്പിച്ചിട്ടും ഉടമയ്ക്ക് തിരികെ ലഭിച്ചില്ല.
ഫോണ്‍ മോഷ്ടിച്ച്‌ മറിച്ചുവിറ്റ സംഭവത്തില്‍ കാസർകോട് ചന്തേര സ്റ്റേഷനിലെ സിവില്‍ പൊലീസ് ഓഫീസർ (സിപിഒ) ബൈജുവിനെതിരെ കേസെടുത്തു.
ഒക്ടോബർ എട്ടിനാണ് സ്റ്റേഷന് സമീപത്തെ വഴിയില്‍നിന്ന് കളഞ്ഞുകിട്ടിയ, പതിനായിരം രൂപയോളം വിലവരുന്ന മൊബൈല്‍ ഫോണ്‍ അതിഥി തൊഴിലാളി സ്റ്റേഷനില്‍ ഏല്‍പ്പിച്ചത്. പാറാവ് ബുക്കില്‍ രേഖപ്പെടുത്തിയ ശേഷം ഫോണ്‍ സ്റ്റേഷനില്‍ സൂക്ഷിച്ചു. പൊലീസ് നടത്തിയ അന്വേഷണത്തില്‍ ഫോണ്‍ പയ്യന്നൂർ രാമന്തളി സ്വദേശിനിയുടേതാണെന്ന് കണ്ടെത്തി. വിവരമറിയിച്ചതിനെ തുടർന്ന് അടുത്ത ദിവസം സ്റ്റേഷനിലെത്തി ഫോണ്‍ കൈപ്പറ്റാമെന്ന് ഉടമ അറിയിച്ചു.
എന്നാല്‍, ഒരാഴ്ചയ്ക്കുശേഷം ഉടമയുടെ മകൻ ഫോണ്‍ വാങ്ങാനായി സ്റ്റേഷനിലെത്തിയപ്പോഴാണ് മേശയില്‍ സൂക്ഷിച്ചിരുന്ന ഫോണ്‍ കാണാതായ വിവരം പുറത്തറിയുന്നത്. ഫോണ്‍ കണ്ടെത്തി അറിയിക്കാമെന്ന് പറഞ്ഞ് ഇയാളെ തിരിച്ചയച്ചു.
സംഭവത്തിനു പിന്നാലെ ഫോണ്‍ കാണാതായ വിവരം സ്റ്റേഷനിലെ വാട്സാപ്പ് ഗ്രൂപ്പില്‍ പങ്കുവെച്ചെങ്കിലും ആരും വിവരമറിയിച്ചില്ല. തുടർന്ന് ഫോണിന്റെ ഐഎംഇഐ നമ്പർ കേന്ദ്രീകരിച്ച്‌ സൈബർ സെല്ലിന്റെ സഹായത്തോടെ അന്വേഷണം നടത്തി. ബദിയടുക്കയിലെ നീർച്ചാലില്‍ മറ്റൊരു സിംകാർഡ് ഉപയോഗിച്ച്‌ ഫോണ്‍ പ്രവർത്തിക്കുന്നതായി അന്വേഷണത്തില്‍ കണ്ടെത്തി.
ഫോണ്‍ ഉപയോഗിച്ചിരുന്ന ബദിയടുക്ക സ്വദേശിയെ പൊലീസ് വിളിച്ചുവരുത്തി ചോദ്യം ചെയ്തപ്പോഴാണ് ബൈജുവാണ് ഫോണ്‍ തനിക്ക് വിറ്റതെന്ന് ഇയാള്‍ മൊഴി നല്‍കിയത്. തുടർന്ന് സ്റ്റേഷനിലെ സിസിടിവി ദൃശ്യങ്ങള്‍ പരിശോധിച്ചു. ഒക്ടോബർ 12ന് ബൈജു മേശയില്‍നിന്ന് ഫോണ്‍ എടുക്കുന്നതും സിംകാർഡ് ഊരിമാറ്റി നശിപ്പിക്കുന്നതും ദൃശ്യങ്ങളില്‍ കണ്ടെത്തിയതായാണ് വിവരം.
ഇതോടെയാണ് സിപിഒ ബൈജുവിനെതിരെ കേസെടുത്തത്. സംഭവവുമായി ബന്ധപ്പെട്ട് ജില്ലാ പൊലീസ് മേധാവിക്കും റിപ്പോർട്ട് സമർപ്പിച്ച
