തിരുവനന്തപുരം: മന്ത്രിമാരുടെ വിദേശയാത്രയുമായി ബന്ധപ്പെട്ട വിവാദങ്ങളിൽ ‘തന്ത വൈബ്’ പിടിക്കാനില്ലെന്ന കായിക മന്ത്രി ഒ.
ജെ. ജനീഷിന്റെ പ്രസ്താവനയ്ക്കെതിരെ അതിരൂക്ഷമായ കടന്നാക്രമണവുമായി മുതിർന്ന സിപിഎം നേതാവും മുൻ മന്ത്രിയുമായ എം.എം. മണി. വിവരമില്ലാത്തതുകൊണ്ടാണ് മന്ത്രി ഇത്തരത്തിൽ തരംതാണ വർത്തമാനം പറയുന്നതെന്ന് എം.എം. മണി തുറന്നടിച്ചു.
“മന്ത്രിപ്പണി അറിയില്ലെങ്കിൽ ഭാര്യയുടെ കൂടെപ്പോയിരിക്കാം, അല്ലെങ്കിൽ വീട്ടിലിരുന്ന് വിശ്രമിക്കാം, അതുമല്ലെങ്കിൽ വേറെന്തെങ്കിലും പണിക്ക് പോകാം. ഭരിക്കാൻ പണി അറിയില്ലെങ്കിൽ ആ കസേരയിൽ ഇരിക്കരുത്. മന്ത്രിപ്പണി ഏറ്റെടുത്താൽ ആ പണി മര്യാദയ്ക്ക് ചെയ്യണം. താൻ സംസ്ഥാനത്ത് വൈദ്യുതി മന്ത്രിയായിരുന്നപ്പോൾ മനോഹരമായാണ് വകുപ്പ് ഭരിച്ചത്. പത്ത് വർഷം എംഎൽഎ ആയിരുന്നപ്പോഴും ജനങ്ങൾക്ക് വേണ്ടി കാര്യങ്ങൾ ഭംഗിയായി കൈകാര്യം ചെയ്തിട്ടുണ്ട്” — എം.എം. മണി പരിഹസിച്ചു.
നേരത്തെ, സ്വന്തം വിദേശയാത്രയെ ന്യായീകരിച്ചുകൊണ്ട് മന്ത്രി ഒ.ജെ. ജനീഷ് നടത്തിയ പ്രതികരണങ്ങളാണ് പുതിയ രാഷ്ട്രീയ പോരിന് തിരികൊളുത്തിയത്. മുൻ ഭരണകാലത്ത് പ്രതിപക്ഷം പോയതുപോലെയല്ല തങ്ങൾ വിദേശത്ത് പോയതെന്നും, ഇതിലൊന്നും വിവാദമാക്കേണ്ട ഒരു കാര്യവുമില്ലെന്നുമായിരുന്നു ജനീഷിന്റെ വാദം. “മന്ത്രിമാർക്ക് സ്വന്തമായി സ്വകാര്യ നിമിഷങ്ങൾ പാടില്ലേ? ഇത് ഏത് കാലമാണ്? തനിക്ക് 37 വയസ്സേ ആയിട്ടുള്ളൂ, അതുകൊണ്ട് ‘തന്ത വൈബ്’ പിടിക്കാൻ തൽക്കാലം ഉദ്ദേശിക്കുന്നില്ല. യാത്ര സർക്കാരിന്റെ ചെലവിലല്ല നടത്തിയത്” എന്നുമായിരുന്നു ജനീഷ് മാധ്യമങ്ങളോട് പറഞ്ഞത്. ഈ പരാമർശത്തിനെതിരെയാണ് സ്വന്തം ശൈലിയിൽ രൂക്ഷമായ ഭാഷയിൽ മണി ആഞ്ഞടിച്ചത്.
