ചെന്നൈ: എസ്. ഐ. ആറിനും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനുമെതിരെ കോക്ക്റോച്ച്‌ ജനതാ പാർട്ടിയുടെ നേതൃത്വത്തില്‍ നടക്കുന്ന പ്രക്ഷോഭങ്ങള്‍ക്ക് ഡി എം കെയുടെ പൂർണ്ണ പിന്തുണ.
പാർട്ടി അധ്യക്ഷനും മുൻ മുഖ്യമന്ത്രിയുമായ എം.കെ. സ്റ്റാലിന്റെ അധ്യക്ഷതയില്‍ ചേർന്ന ഡി. എം. കെ എം.പിമാരുടെ യോഗത്തിലാണ് സിജെപിക്ക് പൂർണ പിന്തുണ പ്രഖ്യാപിച്ചത്.
സിജെപിക്ക് പിന്തുണ നല്‍കുന്ന ഡിഎംകെ, തെരഞ്ഞെടുപ്പ് കമ്മീഷനെതിരെ രാഷ്ട്രീയ പ്രതിഷേധങ്ങള്‍ക്ക് നേതൃത്വം നല്‍കുന്ന കോണ്‍ഗ്രസില്‍ നിന്ന് അകലം പാലിക്കാനും തീരുമാനിച്ചു.
മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കുക, എസ്.ഐ.ആർ റദ്ദാക്കുക, ബാലറ്റ് പേപ്പർ രീതി പുനഃസ്ഥാപിക്കുക എന്നീ ആവശ്യങ്ങള്‍ ഇന്ന് ചേർന്ന ഡിഎംകെ യോഗം പ്രമേയത്തിലൂടെ ഉന്നയിച്ചു. വോട്ടർപട്ടിക പരിഷ്കരണത്തില്‍ കോണ്‍ഗ്രസും ഭരണകക്ഷിയായ ടി.വി.കെയും ഇരട്ടത്താപ്പാണ് സ്വീകരിക്കുന്നതെന്നും സിജെപി ആരോപിച്ചു.
'ഡി.എം.കെ ഇന്ത്യയിലെ യുവതയ്ക്കൊപ്പം നിലകൊള്ളുമെന്ന് ചെന്നൈയില്‍ എസ്.ഐ.ആറിനെതിരെ നടന്ന വിദ്യാർത്ഥി പ്രതിഷേധത്തില്‍ പങ്കെടുത്ത ശേഷം ഡി.എം.കെ ഡെപ്യൂട്ടി ജനറല്‍ സെക്രട്ടറിയും പാർലമെന്ററി പാർട്ടി നേതാവുമായ കനിമൊഴി കരുണാനിധിയും വ്യക്തമാക്കി.
