തിരുവനന്തപുരം: എം ജി സർവകലാശാലയിലെ മാധ്യമ നിയന്ത്രണത്തില്‍ വിശദീകരണവുമായി വിസി ഡി. മാവൂത്.
സർവകലാശാലയില്‍ മാധ്യമങ്ങളെ വിലക്കാനോ വാർത്തകള്‍ ശേഖരിക്കുന്നത് തടയാനോ ഒരു തീരുമാനവും എടുത്തിട്ടില്ലെന്നും സന്ദർശകർക്ക്‌ ഏർപ്പെടുത്തിയിട്ടുള്ളത് പോലെ സർവകലാശാലയിലേക്കുള്ള പ്രവേശനം സുതാര്യമാക്കാനുള്ള നിർദേശമാണ് നല്‍കിയതെന്നും വിസി പ്രതികരിച്ചു.
മുൻകൂർ അനുമതിയോടുകൂടി സർവ്വകലാശാലയില്‍ പ്രവേശിക്കുന്നതിന് മാധ്യമപ്രവർത്തകർക്ക് തടസ്സമില്ല. സർവകലാശാല പിആർഒയെ മുൻകൂട്ടി അറിയിച്ചശേഷം മാധ്യമങ്ങള്‍ക്ക് സർവകലാശാലയില്‍ പ്രവേശിക്കാം. ആവശ്യമായ എല്ലാ സഹായങ്ങളും പിആർഒ ഓഫീസില്‍ നിന്ന് ലഭ്യമാക്കുമെന്നും വിസി അറിയിച്ചു.
അതേസമയം വിഷയത്തില്‍ സർവകലാശാല വിസിയുടെ തീരുമാനത്തിനെതിരെയാണ് ഉന്നത വിദ്യാഭ്യാസ മന്ത്രിയുടെ പ്രതികരണം. മാധ്യമ നിയന്ത്രണവുമായി ബന്ധപ്പെട്ട ഉത്തരവ് പിൻവലിക്കണമെന്നും മാധ്യമ സ്വാതന്ത്ര്യം സംരക്ഷിക്കണമെന്നും മന്ത്രി റോജി എം ജോണ്‍ പറഞ്ഞു. ഏകാധിപത്യ പ്രവണതയുടെ ഭാഗമാണ് ഈ ഉത്തരവ്. ജനാധിപത്യവിരുദ്ധ സമീപനമാണ് ഉത്തരവിറക്കിയതിലൂടെ കണ്ടത്. സർവ്വകലാശാലകളില്‍ ഏകാധിപത്യ നടപടികള്‍ അനുവദിക്കില്ല. മാധ്യമ സ്വാതന്ത്ര്യം സംരക്ഷിക്കപ്പെടണം. നടപടി ഏകാധിപത്യ പ്രവണതയാണ് വ്യക്തമാക്കുന്നത്. മാധ്യമ സ്വാതന്ത്ര്യത്തെ ഹനിക്കാൻ ആര് ശ്രമിച്ചാലും, അത്തരം നീക്കങ്ങളെ ശക്തമായി എതിർക്കുക തന്നെ ചെയ്യുമെന്നും ഉത്തരവ് അടിയന്തരമായി പിൻവലിക്കാൻ സർവ്വകലാശാലാ അധികൃതർ തയ്യാറാകണമെന്നും റോജി എം ജോണ്‍ പറഞ്ഞു.
