തിരുവനന്തപുരം: ഫുട്ബോള് ഇതിഹാസം മെസിയെ കേരളത്തില് എത്തിക്കാമെന്ന പേരില് നടത്തിയ തട്ടിപ്പുമായി ബന്ധപ്പെട്ട് സ്പോർട്സ് കൗണ്സില് മുൻ പ്രസിഡൻ്റ് യു ഷറഫലിയുടെ സ്പോർട്സ് അക്കാദമിക്ക് സ്പോണ്സറായ റിപ്പോർട്ടർ ബ്രോഡ്കാസ്റ്റിങ് കമ്പനി (ആർബിസി) യില് നിന്ന് രണ്ട് കോടി രൂപ ലഭിച്ചതായി കണ്ടെത്തല്.
ആർബിസിയുടെ അക്കൗണ്ടുകള് പരിശോധിച്ചപ്പോഴാണ് ഷറഫലിയുടെ സ്ഥാപനത്തിന് രണ്ട് കോടി രൂപ കൈമാറിയതിൻ്റെ രേഖകള് ലഭിച്ചത്. പണം കൈമാറിയതിൻ്റെ രേഖകള് എസ്ഐടി ശേഖരിച്ചു.
ഷറഫലിയെ എസ്ഐടി ഉടൻ ചോദ്യം ചെയ്യും. സംസ്ഥാന സർക്കാരിന്റെ അനുമതി കിട്ടും മുമ്പേ സ്പോണ്സറും അർജന്റീന ഫുട്ബോള് അസോസിയേഷനും തമ്മില് ഉണ്ടാക്കിയ കരാറില് സാക്ഷിയായി ഒപ്പിട്ടത് ഷറഫലിയായിരുന്നു.
മെസിയെയും അർജന്റീന ഫുട്ബോള് ടീമിനെയും കേരളത്തില് എത്തിക്കാമെന്ന പേരില് നടത്തിയ തട്ടിപ്പിൻ്റെ തുടക്കം മുതല് നടത്തിയ ഇടപാടുകള് സംശയാസ്പദമായിരുന്ന സാഹചര്യത്തിലാണ് യു ഷറഫലിയെയും കേസില് പ്രതി ചേർക്കണമെന്ന് എസ്ഐടി ആവശ്യപ്പെട്ടിരുന്നത്.
അഴിമതി നിരോധന നിയമപ്രകാരം ഷറഫലിക്കെതിരെയും കേസെടുത്ത് അന്വേഷണം നടത്താൻ സംസ്ഥാന സർക്കാർ അനുമതി നല്കിയിരുന്നു. ഇതോടെ ആണ് ഷറഫലിയെയും കേസില് പ്രതി ചേർത്തത്.
ഇതിനിടെ, ആർബിസിയുടെ പണമിടപാടുകള് കേന്ദ്രീകരിച്ചു നടത്തിയ പരിശോധനയിലാണ് രണ്ട് കോടി രൂപയുടെ സംശയാസ്പദമായ ഇടപാടുകള് എസ്ഐടി കണ്ടെത്തിയത്.






