കൊച്ചി: മെസ്സിയുടെ പേരിലെ തട്ടിപ്പില്‍ റിപ്പോർട്ടർ ബ്രോഡ്കാസ്റ്റിംഗ് കമ്പനിക്ക് പണം നല്‍കിയ ധനകാര്യ സ്ഥാപനങ്ങളിലേക്കും അന്വേഷണം വ്യാപിപ്പിച്ച്‌ സ്പെഷ്യല്‍ ഇൻവസ്റ്റിഗേഷൻ ടീം.
ഫോറെൻസിക് ഓഡിറ്റിങ്ങിലേക്ക് നീങ്ങുകയാണ് അന്വേഷണ സംഘം. പണം വന്നു പോയ വഴികള്‍ തേടി ആന്‍റോ അഗസ്റ്റിന്‍റെ ബാങ്ക് അകൗണ്ടുകള്‍ കേന്ദ്രീകരിച്ചാണ് ഓഡിറ്റിങ് നടത്തുന്നത്.
രണ്ടു ലക്ഷം രൂപക്ക് മേലുള്ള ഫണ്ട് കൈമാറ്റങ്ങളാണ് ഫോറെൻസിക് ഓഡിറ്റിങ്ങിലൂടെ പരിശോധിക്കുന്നത്. പണത്തിന്‍റെ യഥാർത്ഥ ഗുണഭോക്താക്കള്‍ ആരെന്ന് കണ്ടെത്താനാണ് അന്വേഷണം.
ഗോകുലത്തിനും ഹിന്ദുജ ഫൈനാസിനും പുറമെ ആന്‍റോ അഗസ്റ്റിനും മത്സരത്തിനെന്നു പറഞ്ഞു വ്യാപകമായി ഫണ്ട് ശേഖരിച്ചതായാണ് എസ്‌ഐടിയുടെ വിലയിരുത്തല്‍.
ഇതിനായി വൻകിടക്കാരുടെ യോഗം മലപ്പുറത്തു വിളിച്ചു ചേർത്തിരുന്നു. ഇത് സ്ഥിരീകരിച്ച്‌ യോഗത്തില്‍ പങ്കെടുത്ത ചിലർ എസ്‌ഐടിക്ക് മൊഴി നല്‍കി.
അർജന്‍റീനയ്ക്ക് വേണ്ടി വിദേശത്തേക്ക് അയച്ച പണം ആരുടെ കയ്യിലെത്തിയെന്നും എസ്‌ഐടി അന്വേഷിക്കുന്നുണ്ട്. സാമ്പത്തിക ഇടപാടുകള്‍ സംബന്ധിച്ച്‌ അർജന്റീന ഫുട്ബോള്‍ അസോസിയേഷനില്‍ നിന്നും എസ്‌ഐടി വിവരം തേടും.
