ഡൽഹി: കെപിസിസി അധ്യക്ഷ സ്ഥാനത്തേക്കുള്ള പുതിയ നിയമനത്തില്‍ സംസ്ഥാന നേതൃത്വത്തിനിടയില്‍ ഇനിയും സമവായമായില്ല.
ഒരു പേരിലേക്ക് എത്താത്ത സാഹചര്യത്തില്‍ നിലവിലെ അധ്യക്ഷൻ സണ്ണി ജോസഫ് തന്നെ തല്‍ക്കാലം പദവിയില്‍ തുടർന്നേക്കും.
അധ്യക്ഷ പദവിക്കായി നേതാക്കള്‍ക്കിടയില്‍ അവകാശവാദങ്ങളും ചരടുവലികളും ശക്തമായതോടെ, തർക്കം മുറുകുന്ന സാഹചര്യത്തില്‍ കെപിസിസി അധ്യക്ഷ സ്ഥാനത്തേക്കുള്ള നിയമനം ഇപ്പോള്‍ വേണ്ടെന്നാണ് കോണ്‍ഗ്രസ് ഹൈക്കമാൻഡിന്റെ നിലപാട്.
സംസ്ഥാന മന്ത്രിസഭാ പദവി വഹിക്കുന്നതിനൊപ്പം അധ്യക്ഷ സ്ഥാനവും സണ്ണി ജോസഫ് വഹിക്കുന്നതില്‍ പ്രശ്നമല്ലെന്ന സൂചനയാണ് കേന്ദ്ര നേതൃത്വം നല്‍കുന്നത്.
കർണ്ണാടകയില്‍ ഉപമുഖ്യമന്ത്രി പദവിക്കൊപ്പം ഡി കെ. ശിവകുമാറും, തെലങ്കാനയില്‍ മുഖ്യമന്ത്രി പദവിക്കൊപ്പം രേവന്ത് റെഡ്ഡിയും പിസിസി അധ്യക്ഷ സ്ഥാനങ്ങള്‍ ഒരുമിച്ച്‌ വഹിച്ച മുൻ മാതൃകകള്‍ ഹൈക്കമാൻഡ് ചൂണ്ടിക്കാട്ടുന്നു.
സംഘടനാ പ്രവർത്തനങ്ങളില്‍ കൂടുതല്‍ സജീവമായി ഇടപെടാൻ സണ്ണി ജോസഫിന് കേന്ദ്ര നേതൃത്വം നിർദ്ദേശം നല്‍കിയതായാണ് വിവരം.
