ലോകകപ്പ് ഫുട്ബോൾ പോരാട്ടങ്ങൾക്കിടെ അർജന്റീന സൂപ്പർ താരം ലയണൽ മെസ്സിയെയും പോർച്ചുഗൽ സൂപ്പർ താരം ക്രിസ്റ്റ്യാനോ റൊണാൾഡോയെയും വധിക്കാൻ ഭീകരർ പദ്ധതിയിട്ടിരുന്നതായി ഞെട്ടിക്കുന്ന റിപ്പോർട്ട്. അറ്റ്ലാന്റ സ്റ്റേഡിയത്തിൽ വെച്ച് ലയണൽ മെസ്സിയെ ലക്ഷ്യമിട്ട് വധശ്രമം നടത്താനായിരുന്നു ഭീകരരുടെ നീക്കമെന്നാണ് ഔദ്യോഗിക പോലീസ് രേഖകൾ വ്യക്തമാക്കുന്നത്. സ്പാനിഷ് മാധ്യമമായ ‘ഇൻഫോർമാസിയോൺ’ ആണ് കായിക ലോകത്തെ ആകെ നടുക്കിയ ഈ വാർത്ത പുറത്തുവിട്ടത്.
പോലീസ് രേഖകളിലെ വിവരങ്ങൾ പ്രകാരം മെസ്സിയെ കൂടാതെ ലോക ഫുട്ബോളിലെ മറ്റൊരു ഇതിഹാസ താരമായ ക്രിസ്റ്റ്യാനോ റൊണാൾഡോയ്ക്കെതിരെയും സമാന രീതിയിലുള്ള ആക്രമണങ്ങൾക്ക് പദ്ധതിയിട്ടിരുന്നു. പ്രമുഖ കളിക്കാർക്ക് നേരെ ഉയർന്ന ബോംബ് ഭീഷണികൾ, മത്സരങ്ങൾ നിയന്ത്രിച്ച റഫറിമാർക്കെതിരെ നടപ്പിലാക്കിയ ആസൂത്രിത സൈബറാക്രമണങ്ങൾ, സ്റ്റേഡിയങ്ങളിലെ സുരക്ഷാ വീഴ്ചകൾ തുടങ്ങിയ സുരക്ഷാ ഭീഷണികളെക്കുറിച്ചുള്ള അതീവ ഗുരുതരവും ഞെട്ടിക്കുന്നതുമായ വിവരങ്ങളാണ് റിപ്പോർട്ടിൽ പരാമർശിക്കുന്നത്.
ലോകകപ്പിന്റെ തിളക്കത്തിന് മേൽ കരിനിഴൽ വീഴ്ത്തുന്ന തരത്തിലുള്ള വിവരങ്ങളാണ് ഇപ്പോൾ പുറത്തുവന്നിരിക്കുന്നത്. സുരക്ഷാ ഏജൻസികളുടെയും പോലീസിന്റെയും സമയബന്ധിതമായ ഇടപെടലുകളും അതീവ ജാഗ്രതയുമാണ് വൻ ദുരന്തം ഒഴിവാക്കാൻ സഹായിച്ചതെന്നാണ് വിലയിരുത്തൽ. സംഭവത്തിൽ കൂടുതൽ അന്വേഷണം പുരോഗമിക്കുകയാണെന്നും താരങ്ങളുടെ സുരക്ഷ ഉറപ്പാക്കാൻ ശക്തമായ നടപടികൾ സ്വീകരിച്ചിരുന്നതായും അധികൃതർ വ്യക്തമാക്കി.
