വാളാഞ്ചേരി: മലപ്പുറം വളാഞ്ചേരിയില്‍ ലോഡ്ജ് കേന്ദ്രീകരിച്ച്‌ നടന്നിരുന്ന ലഹരി വില്‍പനയ്ക്കിടെ എംഡിഎംഎയുമായി യുവതിയടക്കം രണ്ടുപേർ എക്സൈസിന്റെ പിടിയിലായി.
അങ്ങാടിപ്പുറം സ്വദേശി നബീല്‍, കണ്ണൂർ അഴീക്കോട് സ്വദേശിനി ആരതി എന്നിവരാണ് പിടിയിലായത്. ഇവരില്‍നിന്ന് 1.5 ഗ്രാം എംഡിഎംഎ എക്സൈസ് സംഘം പിടിച്ചെടുത്തു.പിടിയിലായ നബീല്‍ മുൻപും ലഹരിക്കടത്ത് കേസുകളില്‍ പ്രതിയായിട്ടുള്ളയാളാണ്. ഒന്നര മാസം മുമ്പ് ബംഗളൂരുവില്‍ വെച്ച്‌ 27 ഗ്രാം എംഡിഎംഎ പിടികൂടിയ കേസില്‍ ജാമ്യത്തിലിറങ്ങിയ ശേഷമാണ് ഇയാള്‍ വീണ്ടും വളാഞ്ചേരിയിലെത്തി ലഹരി വില്‍പന നടത്തിയത്. പ്രതികളെ എക്സൈസ് സംഘം ചോദ്യം ചെയ്തുവരികയാണ്. ലഹരിയുടെ ഉറവിടത്തെക്കുറിച്ചും വിതരണ ശൃംഖലയെക്കുറിച്ചും അന്വേഷണം പുരോഗമിക്കുകയാണെന്ന് എക്സൈസ് ഉദ്യോഗസ്ഥർ അറിയിച്ചു.
