കണ്ണൂർ : ഡല്ഹി കേന്ദ്രീകരിച്ച് മാരക ലഹരിവസ്തുവായ എംഡിഎംഎ നിർമ്മിച്ച് വിവിധയിടങ്ങളിലേക്ക് വിതരണം ചെയ്തിരുന്ന രണ്ട് വിദേശ വനിതകളെ കണ്ണൂർ സിറ്റി പോലീസ് സ്ക്വാഡ് സാഹസികമായി പിടികൂടി. നൈജീരിയൻ സ്വദേശിനി ചിനെലോ ലിലിയൻ, കാമറൂണ് സ്വദേശിനി ഫിലോമെനെ ചാൻസെലിൻ എന്നിവരെയാണ് ഡല്ഹിയിലെ ബുരാരിയില് വെച്ച് കണ്ണൂർ സിറ്റി പോലീസ് കസ്റ്റഡിയിലെടുത്തതെന്ന് കണ്ണൂർ റേഞ്ച് ഡിഐജി കെ. കാർത്തിക് വാർത്താസമ്മേളനത്തില് അറിയിച്ചു.
ന്യൂമാഹിയില് വെച്ച് 0.6 ഗ്രാം എംഡിഎംഎയുമായി രജിനാസ് എന്നയാള് പിടിയിലായതാണ് കേസില് നിർണ്ണായക വഴിത്തിരിവായത്. ഇയാളെ വിശദമായി ചോദ്യം ചെയ്തതില് നിന്ന് ലഹരി എത്തിച്ചു നല്കിയത് മുഹമ്മദ് സമീലാണെന്ന് വ്യക്തമായി. തുടർന്ന് സമീലിന്റെ വീട്ടിലും വാഹനത്തിലും പോലീസ് നടത്തിയ പരിശോധനയില് 185 ഗ്രാം എംഡിഎംഎ പിടിച്ചെടുത്തു. തുടർന്ന് സമീലിന്റെ ഫോണ് കോളുകളും ബാങ്ക് അക്കൗണ്ട് രേഖകളും കേന്ദ്രീകരിച്ച് നടത്തിയ അന്വേഷണത്തിലാണ് 'തബു' എന്നറിയപ്പെടുന്ന മുജ്തബയെക്കുറിച്ചുള്ള വിവരങ്ങള് പുറത്തുവന്നത്. ലഹരി ഇടനിലക്കാർ വഴി ആളൊഴിഞ്ഞ കേന്ദ്രങ്ങളില് എംഡിഎംഎ ഒളിപ്പിച്ചുവെച്ച് ലൊക്കേഷൻ മാത്രം ആവശ്യക്കാർക്ക് കൈമാറുന്ന ഹൈടെക് രീതീയാണ് തബു പിന്തുടർന്നിരുന്നത്.
ശാസ്ത്രീയ അന്വേഷണത്തിനൊടുവില് ബെംഗളൂരുവില് വെച്ച് തബുവിനെയും പോലീസ് സംഘം കസ്റ്റഡിയിലെടുത്തു. ഡല്ഹിയില് നിന്ന് പാഴ്സല് വഴിയാണ് ഇവർ സംസ്ഥാനത്തേക്ക് ലഹരി കടത്തിയിരുന്നത്. ഈ ശൃംഖലയെ കേന്ദ്രീകരിച്ച് നടത്തിയ അന്വേഷണമാണ് ഡല്ഹിയില് എംഡിഎംഎ നിർമ്മാണം നടത്തിയിരുന്ന വിദേശ വനിതകളിലേക്ക് അന്വേഷണ സംഘത്തെ എത്തിച്ചത്. കണ്ണൂർ സിറ്റി പോലീസിന്റെ പ്രത്യേക സ്ക്വാഡ് അംഗങ്ങള് പത്തു ദിവസത്തോളം ഡല്ഹിയില് ക്യാമ്പ് ചെയ്താണ് പ്രതികളെ വലയിലാക്കിയത്. പ്രതികള് നിരന്തരം സിം കാർഡുകള് മാറ്റിയും ഇരുപതോളം ബാങ്ക് അക്കൗണ്ടുകള് വഴിയും കോടികളുടെ സാമ്പത്തിക ഇടപാടുകള് നടത്തിയതായി കണ്ടെത്തിയിട്ടുണ്ട്.
പ്രതികളില് നിന്ന് അമ്പതോളം വ്യാജ ആധാർ കാർഡുകള്, 15 പാൻ കാർഡുകള്, ചെക്ക് ബുക്കുകള്, വ്യാജ ഡിഗ്രി സർട്ടിഫിക്കറ്റുകള് എന്നിവ പോലീസ് പിടിച്ചെടുത്തു. വിദേശത്തുനിന്ന് പാഴ്സല് വഴിയാണ് ഇവർക്ക് മയക്കുമരുന്ന് നിർമ്മാണത്തിനാവശ്യമായ അസംസ്കൃത വസ്തുക്കള് ലഭിച്ചിരുന്നതെന്നും കേസില് വിശദമായ തുടരന്വേഷണം പുരോഗമിക്കുകയാണെന്നും ഡിഐജി വ്യക്തമാക്കി. കമ്മീഷണറുടെ ഓഫീസില് നടന്ന വാർത്താസമ്മേളനത്തില് സിറ്റി പോലീസ് കമ്മീഷണർ വിജയ് ഭാരത് റെഡ്ഡി, തലശ്ശേരി എഎസ്പി നന്ദഗോപൻ എന്നിവരും പങ്കെടുത്തു.
