പാലക്കാട്: നെടുമ്പാശേരിയില്‍ മൂന്നുപേരുടെ ജീവനെടുത്ത വാഹനാപകടക്കേസിലെ പ്രതിയെ രക്ഷിക്കാന്‍ ശ്രമം നടക്കുന്നുവെന്ന ആരോപണവുമായി അപകടത്തില്‍ കൊല്ലപ്പെട്ട പാലക്കാട് സ്വദേശിനി ഗോപികയുടെ കുടുംബം.
പ്രതി സുഹൈല്‍ സജീവ് അമിതമായി മദ്യപിച്ചിരുന്നുവെന്ന് എഫ്‌ഐആറില്‍ പൊലീസ് രേഖപ്പെടുത്തിയിട്ടില്ലെന്ന് ഗോപികയുടെ കുടുംബം ആരോപിച്ചു. ആഭ്യന്തരമന്ത്രിയുടെ മണ്ഡലത്തില്‍പ്പെടുന്ന ആളാണ് പ്രതിയെന്നും അന്വേഷണം അട്ടിമറിക്കാന്‍ ശ്രമം നടക്കുന്നുവെന്ന് സംശയമുണ്ടെന്നും പാലക്കാട് കരിമ്പ സ്വദേശിയായ ഗോപികയുടെ കുടുംബം ആരോപിച്ചു. അധികാരകേന്ദ്രങ്ങളില്‍ സ്വാധീനമുള്ളതുകൊണ്ടാകാം വാഹനാപകടമുണ്ടാക്കിയതിന് പിന്നാലെ, എന്തുവന്നാലും ബാപ്പ നോക്കിക്കോളുമെന്ന് പ്രതി പറഞ്ഞതെന്നും ഗോപികയുടെ പിതാവ് വെളിപ്പെടുത്തി.
അപകടം നടന്ന ദിവസം രാവിലെ ആറേമുക്കാലിന് താന്‍ നെടുമ്പാശേരി റൂറല്‍ സ്റ്റേഷനിലെത്തിയപ്പോള്‍ ലോക്കപ്പിനുള്ളില്‍ പ്രതി സുഹൈല്‍ മലര്‍ന്നു കിടക്കുകയായിരുന്നുവെന്ന് പിതാവ് പറഞ്ഞു. സിഐ വിളിച്ച്‌ എഴുന്നേല്‍പ്പിക്കുമ്പോഴും പൂസ് മാറിയിട്ടില്ലായിരുന്നുവെന്ന് പൊലീസുകാര്‍ പറഞ്ഞറിഞ്ഞതായും അദ്ദേഹം വ്യക്തമാക്കി. സമൂഹമാധ്യമങ്ങളിലൂടെ മരിച്ചുപോയ മകളെയും കുടുംബത്തെയും താറടിക്കാന്‍ ശ്രമിക്കുന്നുവെന്നും ചിലരുടെ ശക്തമായ പിന്തുണ പ്രതിക്ക് ലഭിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു. വീട്ടിലെ കഷ്ടപ്പാടുകളും ബുദ്ധിമുട്ടുകളും അറിഞ്ഞും മനസ്സിലാക്കിയും പഠനത്തിനൊപ്പം ജോലി മുന്നോട്ടുകൊണ്ടുപോയ ആളാണ് മകളെന്നും പാര്‍ട്ട് ടൈമായി രാത്രി ഡ്യൂട്ടിയെടുത്താണ് പഠിച്ചതെന്നും പിതാവ് കണ്ണീരോടെ ഓര്‍ത്തു.
ഗോപികയുടെ പിതാവിന്റെ വാക്കുകള്‍ ഇങ്ങനെ: 'ആഭ്യന്തരമന്ത്രിയുടെ തന്നെ മണ്ഡലത്തില്‍പ്പെടുന്ന ആളാണ് ഈ പ്രതിയും പ്രതിയുടെ ആളുകളും എന്നാണ് എനിക്ക് അറിയാന്‍ കഴിഞ്ഞിരിക്കുന്നത്. ശരിയാണോ എന്ന് എനിക്കറിയില്ല. അപ്പോള്‍ ഏതെങ്കിലും തരത്തില്‍ അങ്ങനെയുള്ള സ്വാധീനം ഉപയോഗിച്ചിട്ടുണ്ടോ എന്നറിയില്ല. അതുകൊണ്ടായിരിക്കാം ഇവന്‍ ഈ അപകടത്തില്‍പ്പെട്ടതിനുശേഷവും എല്ലാം അവന്റെ ബാപ്പ നോക്കിക്കോളും എന്ന് പറയുന്നത്. തീര്‍ച്ചയായും ഈ പറയുന്ന സ്വാധീനം ഉള്ളതുകൊണ്ടുതന്നെയായിരിക്കും എന്നാണ് ഞാന്‍ കരുതുന്നത്.'
അത് ഈ കാര്യത്തില്‍ വളരെ നന്നായി ഉപയോഗിക്കുന്നുണ്ടെന്നും മനസ്സിലായിട്ടുണ്ട്. അതുകൂടാതെ, സമൂഹമാധ്യമങ്ങളിലൂടെ എന്നെയും എന്റെ മകളെയും ഞങ്ങളുടെ കുടുംബത്തെയും വളരെ മോശമായ രീതിയില്‍ താറടിച്ചുകൊണ്ടുള്ള കാര്യങ്ങള്‍ വരുന്നതായി അറിഞ്ഞു. എന്റെ മോള്‍ ആ കെ.എം.എം. കോളജിന്റെ വൈസ് ചെയര്‍പേഴ്‌സണായിരുന്ന വ്യക്തിയാണ്. അഞ്ചുവര്‍ഷത്തിലധികമായി എന്‍എസ്‌എസ് വൊളന്റിയറായിരുന്നു. സാമൂഹിക പ്രവര്‍ത്തനങ്ങളിലും മറ്റും ഏര്‍പ്പെടുന്ന വ്യക്തിയാണ്. അതല്ലെങ്കില്‍ ഞങ്ങളുടെ നാട്ടില്‍ ഒന്ന് വിളിച്ചുചോദിച്ചു നോക്കണം. എവിടെയെങ്കിലും ഞങ്ങളുടെ കുടുംബത്തെപ്പറ്റി ഏതെങ്കിലും തരത്തിലുള്ള അപവാദം ഉണ്ടായിട്ടുണ്ടോ എന്ന്. തീര്‍ച്ചയായും ഞങ്ങളെ താറടിക്കുക എന്ന ഉദ്ദേശ്യത്തോടെ ചെയ്യുന്നതാണ് സമൂഹമാധ്യമങ്ങളില്‍ വരുന്നത്. ഇത് ചെയ്യിക്കുന്നത് ഈ പറഞ്ഞതുപോലെയുള്ള ആളുകള്‍ തന്നെയായിരിക്കാം. അതെല്ലാം ഞങ്ങള്‍ക്ക് നീതി ലഭിക്കുന്നതിന് തടസ്സമാകുന്നുണ്ടെന്നാണ് ഞാന്‍ കരുതുന്നത്.
പ്രധാന കാര്യം, ഈ എഫ്‌ഐആറില്‍ മദ്യപിച്ചിരിക്കുന്നു എന്ന കാര്യം തന്നെ രേഖപ്പെടുത്തിയിട്ടില്ലെന്നാണ് എനിക്ക് അറിയാന്‍ കഴിഞ്ഞിരിക്കുന്നത്. അമിതമായി മദ്യപിച്ച്‌ അമിതവേഗത്തില്‍ വാഹനമോടിച്ച്‌ ഇത്രയും വലിയ അപകടമുണ്ടാക്കി മൂന്ന് പേരെ കൊന്നുകളഞ്ഞിട്ട് അക്കാര്യം ആദ്യത്തെ എഫ്‌ഐആറിലില്ലെന്നതാണ്. എന്ത് അടിസ്ഥാനത്തിലാണ് പ്രതിയെ ബോസ്റ്റല്‍ സ്‌കൂളിലേക്ക് വിട്ടതെന്ന് എനിക്ക് മനസ്സിലാകുന്നില്ല. അതെല്ലാം ഈ കേസ് അട്ടിമറിക്കാനാണെന്നാണ് ഞാന്‍ വിശ്വസിക്കുന്നത്.
വെളുപ്പിന് 6.45ന് നെടുമ്പാശേരി റൂറല്‍ സ്റ്റേഷനില്‍ ഞാനും കസിനും കൂടി കയറിച്ചെല്ലുമ്പോള്‍ ഇവന്‍ ലോക്കപ്പില്‍ മലര്‍ന്നു കിടക്കുകയായിരുന്നു. അവനെ വിളിച്ച്‌ എഴുന്നേല്‍പ്പിക്കുന്ന സമയത്തുപോലും നല്ല പൂസാണെന്ന് സിഐ തന്നെ പറയുന്നത് എന്റെ കസിന്‍ കേട്ടതാണ്.
ഇത്തരത്തിലുള്ള കാര്യങ്ങളെല്ലാം ഈ കേസ് അട്ടിമറിക്കാന്‍ ശ്രമിക്കുന്നതിന്റെ ഭാഗമാണ്. അത് ഞങ്ങളുടെ കുടുംബത്തിന് നീതി ലഭിക്കുന്നതിന് വലിയ തടസ്സമാണ്. ഇക്കാര്യത്തില്‍ അടിയന്തരമായ ഇടപെടലുണ്ടാകണം. ആലപ്പുഴക്കാരായ ചിലര്‍ പ്രതിയുടെ ഒപ്പമുണ്ട്. പ്രതിയുടെ അച്ഛന്‍ വലിയ വ്യവസായിയും കോടീശ്വരനുമാണെന്നാണ് ഞങ്ങള്‍ മനസ്സിലാക്കുന്നത്. മിനി കൂപ്പര്‍ അടക്കമുള്ള വാഹനം സ്വന്തം മകന്റെ പിറന്നാളിന് വാങ്ങിക്കൊടുക്കാന്‍ ശേഷിയുള്ള ആളുകളാണ്. നിങ്ങള്‍ക്ക് ഈ വീട് നോക്കിയാല്‍ അറിയാം. ഇതൊരു ഓട്ടോറിക്ഷാ വര്‍ക്ക്‌ഷോപ്പാണ്.
ഞാന്‍ ഓട്ടോറിക്ഷ ഓടിച്ച്‌ ഇവിടെ അടുത്തുള്ള ഒരു റബര്‍ കടയില്‍ നില്‍ക്കുകയാണ്. ആ പണം കൊണ്ടാണ് മക്കളെ വളര്‍ത്തുന്നത്. ഓട്ടോറിക്ഷ ഓടിച്ച്‌ കിട്ടുന്ന പണംകൊണ്ട് ഞാന്‍ ഒരു ചായ പോലും കുടിക്കില്ല. അത് എന്റെ നാട്ടില്‍ ചോദിച്ചുനോക്കിയാല്‍ അറിയാം. ഒരു ഹോട്ടലില്‍നിന്ന് ഒരു ചായ പോലും കുടിക്കാതെ ഇവിടെനിന്ന് ഫ്ലാസ്‌കില്‍ കട്ടന്‍ചായ കൊണ്ടുപോയി കുടിക്കുന്ന മനുഷ്യനാണ് ഞാന്‍. അല്ലാതെ ഏതെങ്കിലും തരത്തില്‍ പണം സമ്പാദിച്ചിട്ടോ മറ്റെന്തെങ്കിലും ചെയ്തിട്ടോ ജീവിക്കുന്ന ആളല്ല. ഒരു രൂപ ചെലവഴിക്കുന്നതില്‍പ്പോലും അത്രയേറെ പിശുക്കി ജീവിച്ചിരുന്ന മനുഷ്യനാണ് ഞാന്‍. അങ്ങനെയാണ് കുട്ടികളെ പഠിപ്പിച്ചത്. കുട്ടികളും അങ്ങനെത്തന്നെയാണ്. എന്റെ കുട്ടികളും അങ്ങനെത്തന്നെ പഠിച്ച്‌ മുന്നോട്ടുപോകണം. ഗോപിക പഠിക്കുമായിരുന്നു. പാര്‍ട്ട് ടൈമായി രാത്രി ഡ്യൂട്ടി ചെയ്തതാണ്'.
അതേസമയം, പൊലീസ് രജിസ്റ്റര്‍ ചെയ്ത പ്രഥമ വിവര റിപ്പോര്‍ട്ടില്‍ KL 07 CR 1001 എന്ന കാറിന്റെ ഡ്രൈവര്‍ അപാകമായും ഉദാസീനമായും മനുഷ്യജീവന് അപകടം വരത്തക്കവിധം അതിവേഗത്തിലും അശ്രദ്ധമായി വാഹനമോടിച്ചുവെന്നും ഇയാസും ഗോപികയും ദേവികയും സഞ്ചരിച്ച സ്‌കൂട്ടറിന്റെ പിന്നില്‍ ഇടിച്ചുവെന്നുമാണ് രേഖപ്പെടുത്തിയിരിക്കുന്നത്. പ്രതിയെ ബോസ്റ്റല്‍ സ്‌കൂളിലേക്ക് മാറ്റിയത് സംശയകരമാണെന്നും മുകളില്‍ നിന്നും ശക്തമായ ഇടപെടല്‍ ഉണ്ടാകുന്നതായും വാപ്പ നോക്കിക്കോളുമെന്ന് പറയുന്നത് ഇതിന്റെ അടിസ്ഥാനത്തിലാണെന്നും കുടുംബം ആരോപിച്ചു. മകള്‍ക്കെതിരെ സമൂഹ മാധ്യമങ്ങളില്‍ അപവാദ പ്രചരണം നടക്കുന്നതായും ഇതിനു പിന്നിലും പ്രതിയുടെ കുടുംബമാണെന്നും കുടുംബം ആരോപിച്ചു.
സംഭവത്തില്‍ ഉന്നതതല അന്വേഷണം ഉണ്ടാകണമെന്നും കുടുംബം ആവശ്യപ്പെടുന്നു. പോസ്റ്റ്മോര്‍ട്ടം കഴിഞ്ഞ ശേഷം വീണ്ടും ബോഡി തുറന്ന് റീപോസ്റ്റ് മോര്‍ട്ടം ചെയ്തതായും അതില്‍ നിന്നും രക്ത സാമ്പിള്‍ എടുത്തിട്ടുണ്ടെന്നും ഇത് എന്തിനാണെന്ന് വ്യക്തമല്ലെന്നും കൂട്ടിച്ചേര്‍ത്തു. ഇവനെ വെറുതെ വിട്ടാല്‍ നാളെ മറ്റു പാവപ്പെട്ടവന്റെ മക്കള്‍ക്കും ഈ ഗതി വരുമെന്നും പണം കൊണ്ട് നേരിടാനാകില്ലെങ്കിലും നിയമം കൊണ്ട് നേരിടുമെന്നും കുടുംബം കൂട്ടിച്ചേര്‍ത്തു. അതേസമയം, അപകടം ഉണ്ടായി ഉടന്‍ തന്നെ എക്സൈസ് നടപടി സ്വീകരിച്ചതായി എക്സൈസ് മന്ത്രി എം. ലിജു വ്യക്തമാക്കി. മൂന്ന് ബാറുകള്‍ക്കെതിരെ എക്സൈസ് വകുപ്പ് കേസെടുത്തതായും ഈ വിഷയത്തില്‍ ഒരു വിട്ടുവീഴ്ചയും ഉണ്ടാവില്ലെന്നും 23 വയസിന് താഴെ പ്രായമുള്ള ആളുകള്‍ക്ക് മദ്യം കൊടുക്കുന്ന ബാറുകള്‍ക്കെതിരെ കര്‍ശന നടപടി സ്വീകരിക്കുമെന്നും അദ്ദേഹം അറിയിച്ചു.
നെടുമ്പാശ്ശേരി വിമാനത്താവളത്തിന് സമീപം പുലര്‍ച്ചെ രണ്ടുമണിയോടെയായിരുന്നു നാടിനെ ഞെട്ടിച്ച അപകടം ഉണ്ടായത്. ചായക്കടയില്‍നിന്ന് സ്‌കൂട്ടറില്‍ അത്താണി ഭാഗത്തേക്ക് പോകുകയായിരുന്ന ഇജാസ്, ഗോപിക, ദേവിക എന്നിവരുടെ വാഹനത്തിന് പിന്നില്‍ അമിതവേഗത്തിലെത്തിയ മിനി കൂപ്പര്‍ ഇടിക്കുകയായിരുന്നു. അപകടത്തിന്റെ ആഘാതത്തില്‍ മൂന്ന് പേരും സംഭവസ്ഥലത്തുതന്നെ ദാരുണമായി മരിച്ചു. തൃക്കാക്കരയിലെ സുക്കോയ ക്രാഫ്റ്റ് ഷോപ്പിലെ ജീവനക്കാരായിരുന്നു മരിച്ച മൂന്ന് പേരും. കര്‍ണാടക സ്വദേശിയാണ് ഇജാസ്. ഗോപിക പാലക്കാട് സ്വദേശിയും ദേവിക വയനാട് സ്വദേശിയുമാണ്. ഈ സംഭവത്തില്‍ സമഗ്രമായ അന്വേഷണം വേണമെന്നാണ് വ്യാപകമായ ഉയരുന്ന ആവശ്യം.
