തിരുവനന്തപുരം: റിട്ടയേർഡ് സൈനിക ഉദ്യോഗസ്ഥൻ മേജർ രവിയുമായി ബന്ധപ്പെട്ട് ഉയർന്നുവന്നിട്ടുള്ള ആരോപണങ്ങളില്‍ കേന്ദ്ര സർക്കാരും പ്രതിരോധ മന്ത്രാലയവും സമഗ്രവും നിഷ്പക്ഷവുമായ അന്വേഷണം നടത്തണമെന്ന് എക്സ്-സർവീസ്മെൻ വെല്‍ഫെയർ ആൻഡ് റീഹാബിലിറ്റേഷൻ അസോസിയേഷൻ ആവശ്യപ്പെട്ടു.
വിഷയത്തില്‍ സംഘടനയുടെ പ്രസിഡന്റ് രാജേഷ് കുമാർ കേന്ദ്ര സർക്കാരിനും പ്രതിരോധ മന്ത്രാലയത്തിനും പരാതി നല്‍കി.
പരിശീലന പ്രവർത്തനങ്ങള്‍, വിദ്യാർത്ഥികള്‍ക്ക് ജോലി ഉറപ്പുനല്‍കുന്നതായുള്ള ആരോപണങ്ങള്‍, തൊഴില്‍ വാഗ്ദാനം നല്‍കി പണം വാങ്ങിയെന്നതടക്കം ആരോപണങ്ങള്‍ പരിശോധിക്കണമെന്നാണ് ആവശ്യം.
വിവിധ സ്കൂളുകളില്‍ വിദ്യാർത്ഥികളുമായി ബന്ധപ്പെട്ട പരിശീലന പ്രവർത്തനങ്ങള്‍ നടത്തുകയും, തങ്ങളുടെ പരിശീലന അക്കാദമിയില്‍ ചേർന്നാല്‍ ജോലി ലഭിക്കുമെന്ന് ഉറപ്പുനല്‍കുകയും ചെയ്തതായുള്ള ആരോപണങ്ങള്‍ അന്വേഷിക്കണമെന്ന് സംഘടന ആവശ്യപ്പെട്ടു.
ഇത്തരത്തിലുള്ള വാഗ്ദാനങ്ങളുടെ അടിസ്ഥാനത്തില്‍ വിദ്യാർത്ഥികളില്‍ നിന്നോ തൊഴില്‍ അന്വേഷകരില്‍ നിന്നോ പണം ഈടാക്കിയിട്ടുണ്ടോ എന്നും, ബന്ധപ്പെട്ട പരിശീലന സ്ഥാപനങ്ങള്‍ക്കും റിക്രൂട്ട്‌മെന്റ് ഏജൻസികള്‍ക്കും ആവശ്യമായ ഔദ്യോഗിക അംഗീകാരങ്ങളുണ്ടോ തുടങ്ങിയ കാര്യങ്ങളില്‍ വ്യക്തത വരുത്തണമെന്നും സംഘടന ആവശ്യപ്പെട്ടു.
2026 ഒക്ടോബർ 19 മുതല്‍ 25 വരെ വിവിധ മാധ്യമങ്ങളില്‍ മേജർ രവിയുടേതായി റിപ്പോർട്ട് ചെയ്യപ്പെട്ട അഭിമുഖങ്ങളും പ്രസ്താവനകളും പരിശോധിക്കണമെന്നും ആവശ്യമുണ്ട്. ദാവൂദ് ഇബ്രാഹിമിനെയും കേന്ദ്ര സർക്കാരിനെയും ബന്ധപ്പെടുത്തി നടത്തിയ പ്രസ്താവനകളുടെ യാഥാർഥ്യവും പശ്ചാത്തലവും ബന്ധപ്പെട്ട അധികാരികള്‍ പരിശോധിക്കണം.
മാധ്യമങ്ങളില്‍ വന്ന യഥാർഥ അഭിമുഖങ്ങളും വീഡിയോ റെക്കോർഡുകളും സൂക്ഷ്മമായി പരിശോധിച്ച ശേഷം മാത്രമേ ഇക്കാര്യത്തില്‍ ഒരു നിഗമനത്തിലെത്താവൂ എന്നും സംഘടന ആവശ്യപ്പെട്ടു.
