പത്തനംതിട്ട: യുവതിയെ ഗർഭിണിയാക്കി പിന്നീട് ബന്ധത്തില്‍ നിന്ന് പിന്മാറിയെന്ന പരാതിയില്‍ സിഐയ്ക്ക് സസ്പെൻഷൻ.
പത്തനംതിട്ട ഡിസിആർബി (ഡിസ്ട്രിക്‌ട് ക്രൈം റെക്കോഡ്സ് ബ്യൂറോ) സിഐയായ ടി കെ വിനോദ് കൃഷ്ണയെയാണ് ഐജി സസ്പെൻഡ് ചെയ്തത്.
പത്തനംതിട്ടയില്‍ വിനോദ് കൃഷ്ണ നേരത്തേ ജോലി ചെയ്തിരുന്ന സ്റ്റേഷൻ പരിധിയിലുള്ള 28-കാരിയാണ് പരാതിക്കാരി. യുവതിയുമായി ബന്ധം സ്ഥാപിച്ച വിനോദ് കൃഷ്ണ കഴിഞ്ഞ നിയമസഭ തെരഞ്ഞെടുപ്പ് കാലത്ത് തിരുവനന്തപുരത്തേക്ക് സ്ഥലംമാറ്റം ലഭിച്ചപ്പോള്‍ യുവതിയെയും ഒപ്പംകൊണ്ടുപോയി.
തിരുവനന്തപുരത്തെ പൊലീസ് ക്വാർട്ടേഴ്സില്‍ ഭാര്യയെന്ന വ്യാജേന ഒപ്പം താമസിപ്പിച്ചു.
ഒരു കേസ് അന്വേഷണത്തിന്റെ ഭാഗമായി ഹൈദരാബാദില്‍ പോയപ്പോള്‍ ഇയാള്‍ യുവതിയെയും ഒപ്പം കൊണ്ടുപോയി. ഇതോടെയാണ് സഹപ്രവർത്തകർക്ക് സംശയം തോന്നിയത്.
തുടർന്ന് ഭാര്യയും വീട്ടുകാരും അറിഞ്ഞു. ഇതിനിടെ യുവതി ഗർഭിണിയായി. ഗർഭിണിയായപ്പോള്‍ ഭാര്യയെ ഒഴിവാക്കി വിവാഹം കഴിക്കാമെന്ന് ഉറപ്പുകൊടുത്തു.
എന്നാല്‍, ഉറപ്പില്‍ നിന്ന് പിന്മാറിയതോടെയാണ് യുവതി എസ്പിയെ നേരിട്ട് കണ്ട് പരാതി നല്‍കിയത്. എസ്പി അന്വേഷണം നടത്തി ഐജിക്ക് റിപ്പോർട്ട് സമർപ്പിച്ചു. ഇതിനുപിന്നാലെ വിനോദ് കൃഷ്ണനെ സസ്പെൻഡ് ചെയ്ത് ഉത്തരവിറക്കുകയായിരുന്നു.
