മാന്നാനം: സെന്റ് ജോസഫ് ആശ്രമം പള്ളിയില്‍ കടലുണ്ടി ഏല്‍ റൂഹ ധ്യാനകേന്ദ്രം ഡയറക്ടർ ഫാ. റാഫേല്‍ കോക്കാടൻ സിഎംഐ നയിക്കുന്ന ബൈബിള്‍ കണ്‍വൻഷൻ 18ന് തുടങ്ങും.
22ന് കണ്‍വൻഷൻ സമാപിക്കും. 18 ന് വൈകുന്നേരം 5.45ന് ചങ്ങനാശേരി ആർച്ച്‌ബിഷപ് മാർ തോമസ് തറയില്‍ കണ്‍വൻഷൻ ഉദ്ഘാടനം ചെയ്യും.
വൈകുന്നേരം നാലിന് ജപമാല. തുടർന്ന് സിഎംഐ തിരുവനന്തപുരം പ്രൊവിൻഷ്യല്‍ ഫാ. ടോമി കാട്ടാമ്പള്ളിയുടെ മുഖ്യ കാർമികത്വത്തില്‍ വിശുദ്ധ കുർബാന. ഉദ്ഘാടനത്തെ തുടർന്ന് ആറിന് വചന പ്രഘോഷണം, ആരാധന എന്നിവ നടക്കും.
തുടർന്നുള്ള ദിവസങ്ങളില്‍ വൈകുന്നേരം നാലിന് ജപമാല, 4.30ന് വിശുദ്ധ കുർബാന, 5.45ന് വചന പ്രഘോഷണം, ആരാധന എന്നിവ നടക്കും. രാത്രി ഒമ്പതിന് സമാപിക്കും.
സിഎംഐ സഭയുടെ വികാരി ജനറാള്‍ ഫാ. ബെന്നി നല്‍ക്കര, വില്ലൂന്നി സെന്റ് സേവ്യേഴ്സ് പള്ളി വികാരി ഫാ. ഫിലിപ്പ് തയ്യില്‍, അതിരമ്പുഴ സെന്റ് മേരീസ് ഫൊറോനാ പള്ളി വികാരി ഫാ. മാത്യു പടിഞ്ഞാറേക്കുറ്റ്, ബംഗളൂരു ക്രൈസ്റ്റ് യൂണിവേഴ്സിറ്റി ചീഫ് ഫിനാൻസ് ഓഫീസർ ഫാ. വർഗീസ് കേളംപറമ്പില്‍ സിഎംഐ എന്നിവർ ഈ ദിവസങ്ങളില്‍ വിശുദ്ധ കുർബാനയില്‍ മുഖ്യ കാർമികത്വം വഹിക്കും.
കണ്‍വൻഷൻ ദിവസങ്ങളില്‍ രാവിലെ ഒമ്പതുമുതല്‍ ഉച്ചകഴിഞ്ഞ് മൂന്നുവരെ സ്പിരിച്വല്‍ ഷെയറിംഗിനും പത്തുമുതല്‍ മൂന്നുവരെ കുമ്പസാരത്തിനും സൗകര്യമുണ്ടാകുമെന്ന് പ്രിയോർ ഫാ. ജോസഫ് വട്ടപ്പറമ്പില്‍ സിഎംഐ അറിയിച്ചു. രോഗികള്‍ക്കും പ്രായമായവർക്കും പന്തലില്‍ പ്രത്യേക ഇരിപ്പിടങ്ങള്‍ ഒരുക്കിയിട്ടുണ്ട്.
മാന്നാനത്തുനിന്നും അതിരമ്പുഴ വഴി ഏറ്റുമാനൂർ, അമ്മഞ്ചേരി വഴി കാരിത്താസ്, മെഡിക്കല്‍ കോളജ് വഴി കോട്ടയം, കുടമാളൂർ വഴി കോട്ടയം, വില്ലൂന്നി വഴി കരിപ്പൂത്തട്ട് എന്നിവിടങ്ങളിലേക്ക് വാഹന സൗകര്യമുണ്ടാകും.
