തിരുവനന്തപുരം: എല്‍ഐസി ഹൗസിംഗ് ഫിനാന്‍സ് ലിമിറ്റഡ് അപ്രന്റിസ് തസ്തികകളിലേക്ക് അപേക്ഷ ക്ഷണിച്ചു.
ആകെ 232 ഒഴിവുകളാണ് ലിസ്റ്റ് ചെയ്തിരിക്കുന്നത്.
ബിരുദം നേടിയ ഉദ്യോഗാര്‍ത്ഥികള്‍ക്ക് പ്രായോഗിക തൊഴില്‍ പരിചയം, പ്രൊഫഷണല്‍ കഴിവുകള്‍, സാമ്പത്തിക സേവന മേഖലയെക്കുറിച്ചുള്ള അറിവ് എന്നിവ നല്‍കുകയാണ് ഈ പ്രോഗ്രാമിന്റെ ലക്ഷ്യം.
യോഗ്യരായ ഉദ്യോഗാര്‍ത്ഥികള്‍ക്ക് നവംബര്‍ 1 വരെ ഓണ്‍ലൈനായി അപേക്ഷ സമര്‍പ്പിക്കാം.
12 മാസമാണ് അപ്രന്റിസ്ഷിപ്പ് കാലാവധി. പരിശീലനം ലഭിക്കുന്ന സ്ഥലത്തിനനുസരിച്ച്‌, തിരഞ്ഞെടുക്കപ്പെടുന്നവര്‍ക്ക് പ്രതിമാസം 14,150 രൂപ മുതല്‍ 16,650 രൂപ വരെ സ്‌റ്റൈപ്പന്‍ഡ് ലഭിക്കും. താല്‍പ്പര്യമുള്ളവര്‍ രജിസ്‌ട്രേഷന്‍ നടപടികള്‍ പൂര്‍ത്തിയാക്കുന്നതിന് മുന്‍പായി യോഗ്യതാ മാനദണ്ഡങ്ങള്‍, പരീക്ഷാ ഷെഡ്യൂള്‍, അപേക്ഷാ നടപടിക്രമങ്ങള്‍ എന്നിവ പരിശോധിക്കേണ്ടതാണ്.
യുജിസി അല്ലെങ്കില്‍ എ ഐ സി ടി ഇ അംഗീകൃത സര്‍വകലാശാലയില്‍ നിന്നോ സ്ഥാപനത്തില്‍ നിന്നോ ഏതെങ്കിലും വിഷയത്തില്‍ ബിരുദം നേടിയിരിക്കണം.
2026 ഒക്ടോബര്‍ 1-ലെ കണക്കനുസരിച്ച്‌ ഉദ്യോഗാര്‍ത്ഥികള്‍ക്ക് 20-നും 25-നും ഇടയില്‍ പ്രായമുണ്ടായിരിക്കണം. ഉദ്യോഗാര്‍ത്ഥികള്‍ക്ക് മറ്റൊരു സ്ഥാപനവുമായി നിലവിലുള്ളതോ, റദ്ദാക്കപ്പെട്ടതോ, പൂര്‍ത്തിയായതോ ആയ അപ്രന്റിസ്ഷിപ്പ് കരാര്‍ ഉണ്ടായിരിക്കാന്‍ പാടില്ല.
തിരഞ്ഞെടുക്കപ്പെടുന്നവര്‍ക്ക് നിശ്ചിത മെട്രോപൊളിറ്റന്‍ നഗരങ്ങളില്‍ 16,650 രൂപയും, മറ്റ് നഗരങ്ങളില്‍ 14,150 രൂപയും സ്‌റ്റൈപ്പന്‍ഡായി ലഭിക്കും. ഇതൊരു ഓണ്‍-ദി-ജോബ് പരിശീലന പരിപാടിയാണ്. അതിനാല്‍ ഇതൊരു സ്ഥിര നിയമനമല്ല. അപ്രന്റിസ്ഷിപ്പ് കാലാവധി അവസാനിച്ചതിന് ശേഷം സ്ഥിരമായ തൊഴില്‍ നല്‍കാന്‍ എല്‍ഐസി ഹൗസിംഗ് ഫിനാന്‍സ് ലിമിറ്റഡ് ബാധ്യസ്ഥരായിക്കില്ല.
നിശ്ചിത സമയപരിധിക്കുള്ളില്‍ ഉദ്യോഗാര്‍ത്ഥികള്‍ അപേക്ഷാ നടപടികളും പരീക്ഷയുമായി ബന്ധപ്പെട്ട കാര്യങ്ങളും പൂര്‍ത്തിയാക്കേണ്ടതാണ്. ഓണ്‍ലൈന്‍ പ്രവേശന പരീക്ഷ 2026 നവംബര്‍ 7 ന് നടത്തും. രേഖകളുടെ പരിശോധനയും വ്യക്തിഗത അഭിമുഖവും നവംബര്‍ 15 നായിരിക്കും. നിയമന കത്തുകള്‍ നവംബര്‍ മൂന്നാം വാരത്തില്‍ തന്നെ ലഭിക്കാനാണ് സാധ്യത.
പരിശീലനം ആരംഭിക്കുന്നത് നവംബര്‍ നാലാം വാരത്തില്‍ ആയിരിക്കും. തിരഞ്ഞെടുപ്പ് പ്രക്രിയയില്‍ ഒരു ഓണ്‍ലൈന്‍ പ്രവേശന പരീക്ഷയും, തുടര്‍ന്ന് ഷോര്‍ട്ട്ലിസ്റ്റ് ചെയ്യപ്പെട്ട ഉദ്യോഗാര്‍ത്ഥികള്‍ക്കായി രേഖകളുടെ പരിശോധനയും വ്യക്തിഗത അഭിമുഖവും ഉള്‍പ്പെടുന്നു. 100 മാര്‍ക്കിനുള്ള ഓണ്‍ലൈന്‍ പരീക്ഷയില്‍ 100 ചോദ്യങ്ങളുണ്ടാകും. പരീക്ഷാ സമയം 60 മിനിറ്റാണ്.
ജനറല്‍/ഫിനാന്‍ഷ്യല്‍ അവയര്‍നെസ്, ജനറല്‍ ഇംഗ്ലീഷ്, റീസണിംഗ് എബിലിറ്റി ആന്‍ഡ് കമ്പ്യൂട്ടര്‍ ആപ്റ്റിറ്റിയൂഡ്, ക്വാണ്ടിറ്റേറ്റീവ് ആപ്റ്റിറ്റിയൂഡ് എന്നിങ്ങനെ നാല് വിഭാഗങ്ങള്‍ പരീക്ഷയിലുണ്ടാകും. ഓരോ വിഭാഗത്തിലും 25 ചോദ്യങ്ങളും അവയ്ക്ക് 25 മാര്‍ക്കുമായിരിക്കും ഉണ്ടായിരിക്കുക.
