ആലപ്പുഴ: കുട്ടനാട് താലൂക്കില്‍ 2026-ലെ പ്രളയ ദുരിതാശ്വാസ ധനസഹായ വിതരണത്തില്‍ വൻ ക്രമക്കേടും അഴിമതിയും നടന്നതായി പരാതി ഉയരുന്നു.
പ്രളയത്തില്‍ വീടുകളില്‍ വെള്ളം കയറിയവർക്കായി സർക്കാർ പ്രഖ്യാപിച്ച 10,000 രൂപ വീതമുള്ള അടിയന്തര സാമ്പത്തിക സഹായം വിതരണം ചെയ്തതിലാണ് വ്യാപക രാഷ്ട്രീയ സ്വാധീനവും ക്രമക്കേടും നടന്നിരിക്കുന്നത്.
വീടുകള്‍ക്കുള്ളില്‍ പോയിട്ട് മുറ്റത്തുപോലും വെള്ളം കയറാത്ത നിരവധി പേർക്ക് രാഷ്ട്രീയ പാർട്ടികളുടെ വഴിവിട്ട പിന്തുണയോടെ തുക അനുവദിച്ചു നല്‍കിയതായാണ് പ്രധാന ആരോപണം.
2018-ലെ മഹാപ്രളയത്തില്‍ പോലും വെള്ളം കയറാത്ത വീടുകള്‍ക്കും, പ്രളയത്തിന് ശേഷം ലൈഫ് പദ്ധതിയില്‍ ഉള്‍പ്പെടുത്തി സുരക്ഷിതമായ ഉയർന്ന തറയില്‍ നിർമ്മിച്ച പുതിയ വീടുകള്‍ക്കും യാതൊരുവിധ പ്രാഥമിക പരിശോധനയോ അന്വേഷണമോ കൂടാതെ ധനസഹായം അനുവദിച്ചു നല്‍കിയിട്ടുണ്ട്.
ഒരു വില്ലേജില്‍ മാത്രം നടന്ന ഈ ക്രമക്കേടിന്റെ വ്യക്തമായ വിവരങ്ങളും ഗുണഭോക്തൃ പട്ടികയും നിലവില്‍ പുറത്തുവന്നിട്ടുണ്ട്. പ്രാദേശിക നേതാക്കളുടെ വഴിവിട്ട ഇടപെടലുകളിലൂടെ അർഹരായ പല കുടുംബങ്ങളും പട്ടികയില്‍ നിന്ന് പുറത്തുപോയപ്പോള്‍, രാഷ്ട്രീയ സ്വാധീനമുള്ളവർക്ക് അനർഹമായി പണം ലഭിക്കുകയായിരുന്നു.
ഇപ്പോഴും ചില രാഷ്ട്രീയ പാർട്ടികളുടെ നേതൃത്വത്തില്‍ അനർഹർക്കായി അപേക്ഷകള്‍ സമർപ്പിച്ചുകൊണ്ടിരിക്കുകയാണെന്നും പ്രദേശവാസികള്‍ ആരോപിക്കുന്നു.
