മുംബൈ: മഹാരാഷ്ട്രയില്‍ പ്രായപൂർത്തിയാകാത്ത പെണ്‍കുട്ടി പ്രസവിച്ച നവജാതശിശുവിനെ 40,000 രൂപയ്ക്ക് വിറ്റ സംഭവത്തില്‍ ഡോക്ടറടക്കം ആറുപേർക്കെതിരെ പോലീസ് കേസെടുത്തു.
മഹാരാഷ്ട്രയിലെ നാലസോപാരയിലാണ് നാടിനെ ഞെട്ടിച്ച ഈ ക്രൂരത അരങ്ങേറിയത്. ലൈംഗികാതിക്രമത്തിന് ഇരയായി ഗർഭിണിയായ പതിനേഴുകാരിയാണ് കുഞ്ഞിനെ പ്രസവിച്ചതിന് പിന്നാലെ വില്‍പന നടത്തിയത്. സംഭവത്തില്‍ കുട്ടിയുടെ അമ്മ, പ്രായപൂർത്തിയാകാത്ത പെണ്‍കുട്ടിയെ പീഡിപ്പിച്ച 22-കാരനായ യുവാവ്, ഇടനിലക്കാരിയായ അയല്‍വാസി, പ്രസവമെടുത്ത സ്വകാര്യ ആശുപത്രിയിലെ ഡോക്ടർ, കുഞ്ഞിനെ ദത്തെടുക്കല്‍ എന്ന വ്യാജേന പണം നല്‍കി വാങ്ങിയ ദമ്പതികള്‍ എന്നിവർക്കെതിരെയാണ് കർശന നിയമനടപടി സ്വീകരിച്ചിരിക്കുന്നത്.22-കാരനായ യുവാവുമായി പ്രണയത്തിലായിരുന്ന പെണ്‍കുട്ടി ഗർഭിണിയാണെന്ന് വ്യക്തമായതിനെ തുടർന്നാണ് കുടുംബാംഗങ്ങളുടെ അറിവോടെ പ്രമുഖ സ്വകാര്യ ആശുപത്രിയില്‍ എത്തിച്ചത്. എന്നാല്‍ കുഞ്ഞ് ജനിച്ചയുടൻ യാതൊരുവിധ നിയമപരമായ നടപടികളുമില്ലാതെ, ആശുപത്രിയിലെ ഡോക്ടറുടെയും ഇടനിലക്കാരുടെയും സഹായത്തോടെ ദമ്പതികള്‍ക്ക് കുഞ്ഞിനെ 40,000 രൂപയ്ക്ക് വില്‍ക്കുകയായിരുന്നു.
പിന്നീട് വീട്ടിലേക്ക് മടങ്ങിയ പെണ്‍കുട്ടിക്ക് കഠിനമായ വയറുവേദനയും ശാരീരിക അസ്വസ്ഥതകളും അനുഭവപ്പെട്ടതിനെ തുടർന്ന് കുടുംബാംഗങ്ങള്‍ വസായ്-വിരാർ മുൻസിപ്പല്‍ കോർപ്പറേഷന്റെ കീഴിലുള്ള തുലിഞ്ച് ആശുപത്രിയില്‍ പ്രവേശിപ്പിച്ചു. അവിടെ വെച്ച്‌ ഡോക്ടർമാർ നടത്തിയ വിശദമായ വൈദ്യപരിശോധനയിലാണ് പെണ്‍കുട്ടി അടുത്തിടെ പ്രസവിച്ചിരുന്നുവെന്ന വിവരം പുറത്തുവരുന്നത്.തുടർന്ന് ആശുപത്രി അധികൃതർ വിവരം ഉടൻ തന്നെ പൊലീസില്‍ അറിയിക്കുകയായിരുന്നു. പൊലീസ് നടത്തിയ ഊർജിതമായ അന്വേഷണത്തിലാണ് കുഞ്ഞിനെ പണത്തിന് വിറ്റ ഞെട്ടിക്കുന്ന വിവരം പുറത്തുവന്നത്. പെണ്‍കുട്ടിയെ പീഡനത്തിനിരയാക്കിയ യുവാവിനെതിരെയും, അനധികൃതമായി കുഞ്ഞിനെ വില്‍ക്കാൻ കൂട്ടുനിന്ന അമ്മയ്ക്കും ഡോക്ടർക്കും മറ്റ് പ്രതികള്‍ക്കുമെതിരെ പോക്സോ നിയമപ്രകാരവും ജുവനൈല്‍ ജസ്റ്റിസ് ആക്‌ട് പ്രകാരവും വിവിധ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. വിറ്റ കുഞ്ഞിനെ കണ്ടെത്താനുള്ള ശ്രമങ്ങളും പൊലീസിന്റെ നേതൃത്വത്തില്‍ ഊർജിതമായി നടന്നു വരുന്നു.
