പിറവം: പിറവത്ത് ഒന്‍പതാം ക്ലാസുകാരിയെ രണ്ടു പേര്‍ ചേര്‍ന്ന് തട്ടിക്കൊണ്ടു പോകാന്‍ ശ്രമം, മണീട് നെച്ചൂരില്‍ സ്‌കൂള്‍ സമയം കഴിഞ്ഞ് വീട്ടിലേക്ക് മടങ്ങിയ ഒന്‍പതാം ക്ലാസ് വിദ്യാര്‍ഥിനിയെയാണ് തട്ടിക്കൊണ്ടുപോകാന്‍ ശ്രമിച്ചത്.
വെട്ടിക്കലിലെ സ്വകാര്യ സ്‌കൂളില്‍ പഠിക്കുന്ന പെണ്‍കുട്ടിയാണ് തട്ടിക്കൊണ്ടുപോകല്‍ ശ്രമത്തില്‍നിന്ന് ധീരമായി രക്ഷപ്പെട്ടത്. തിങ്കളാഴ്ച വൈകീട്ട് നാലുമണിയോടെയായിരുന്നു സംഭവം.
സ്‌കൂള്‍ ബസില്‍ മണീട് വൈ.എം.സി.എ. - പുത്തന്‍നട റോഡില്‍ ചെമ്മങ്കഴിത്താഴത്ത് ഇറങ്ങിയ പെണ്‍കുട്ടി, സമീപത്തുള്ള സ്വന്തം വീട്ടിലേക്ക് പോകാന്‍ റോഡ് കുറുകേ കടക്കുകയായിരുന്നു. ഈ സമയം അടുത്തുണ്ടായിരുന്ന ഒരു സ്ത്രീ മിഠായി തരാമെന്ന് പറഞ്ഞ് കുട്ടിയെ അടുത്തേക്ക് വിളിച്ചു. എന്നാല്‍ കുട്ടി ഇത് നിരസിച്ച്‌ മുന്നോട്ടുപോയി. തുടര്‍ന്ന് പിന്നാലെയെത്തിയ സ്ത്രീ കുട്ടിയുടെ മുടിക്ക് കുത്തിപ്പിടിച്ച്‌ നിര്‍ബന്ധപൂര്‍വം വലിച്ചുകൊണ്ടുപോകാന്‍ ശ്രമിക്കുകയായിരുന്നു.
അപകടം മനസ്സിലാക്കിയ പെണ്‍കുട്ടി തക്കസമയത്ത് തിരിഞ്ഞ് സ്ത്രീയുടെ കൈയില്‍ ശക്തിയായി കടിച്ച്‌ പിടിവിടുവിച്ച്‌ ഓടി രക്ഷപ്പെടുകയായിരുന്നു. കുട്ടി പിടിവിടുവിച്ച്‌ ഓടിയതോടെ സ്ത്രീ തൊട്ടുപിന്നാലെ വന്ന ബൈക്കില്‍ കയറി വേഗത്തില്‍ രക്ഷപ്പെടുകയായിരുന്നെന്ന് പെണ്‍കുട്ടി പറഞ്ഞു.
ഓടി വീട്ടിലെത്തിയ കുട്ടി വിവരം രക്ഷിതാക്കളെ അറിയിച്ചു. തുടര്‍ന്ന് വീട്ടുകാര്‍ വാര്‍ഡംഗം പി.ഐ. ഏലിയാസിനെ വിവരമറിയിക്കുകയും, അദ്ദേഹം പിറവം പോലീസില്‍ പരാതി നല്‍കുകയുമായിരുന്നു. സംഭവത്തില്‍ കേസെടുത്ത പോലീസ് സ്ഥലത്തെത്തി പരിശോധന ആരംഭിച്ചു.
മധ്യവയസ്‌കയായ സ്ത്രീയാണ് തന്റെ മുടിയില്‍ പിടിച്ചതെന്നും മഞ്ഞ നിറമുള്ള സാരിയാണ് ഇവര്‍ ധരിച്ചിരുന്നതെന്നും പെണ്‍കുട്ടി പോലീസിന് മൊഴി നല്‍കിയിട്ടുണ്ട്. വൈകീട്ടോടെ പോലീസ് സംഘം വീണ്ടും സംഭവസ്ഥലത്തെത്തി സമീപത്തെ സി.സി.ടി.വി. നിരീക്ഷണ ക്യാമറ ദൃശ്യങ്ങള്‍ വിശദമായി പരിശോധിച്ചു. അതേസമയം, ഇത്തരത്തിലുള്ള ഒരു സ്ത്രീയെയും രണ്ട് പുരുഷന്മാരെയും രാവിലെ മുതല്‍ പ്രദേശത്ത് കണ്ടിരുന്നതായി മേഖലയിലെ ഓട്ടോ തൊഴിലാളികളും വ്യക്തമാക്കിയിട്ടുണ്ട്. പോലീസിന്റെ നേതൃത്വത്തില്‍ അന്വേഷണം ഊര്‍ജിതമായി പുരോഗമിക്കുകയാണ്.
