മലപ്പുറം: വ്യവസായിക വകുപ്പ് മന്ത്രി പി.കെ. കുഞ്ഞാലിക്കുട്ടിക്കെതിരെ അശ്ലീല പരാമർശം നടത്തിയെന്ന പരാതിയിൽ ബ്രഹ്മ കോഗ്നിഷൻ (BRAHMA COGNITION) എന്ന യൂട്യൂബ് ചാനലിനെതിരെ കേസ് രജിസ്റ്റർ ചെയ്ത് മലപ്പുറം സൈബർ പൊലീസ്.
തിരുവനന്തപുരത്ത് നടന്ന ഒരു പരിപാടിയിൽ പി.കെ. കുഞ്ഞാലിക്കുട്ടിയും കെ.എം. ഷാജിയും നിലവിളക്ക് കൊളുത്തിയ സംഭവവുമായി ബന്ധപ്പെട്ട് അശ്ലീലവും മതസ്പർദ്ധ വളർത്തുന്നതുമായ പരാമർശങ്ങൾ ഉൾപ്പെടുത്തി വീഡിയോ പ്രസിദ്ധീകരിച്ചെന്നാണ് കേസ്. നിലവിളക്ക്, ഹലാൽ, ഹറാം തുടങ്ങിയ മതപരമായ ആശയങ്ങൾ ഉപയോഗിച്ച് സമൂഹത്തിൽ വിദ്വേഷവും ശത്രുതയും സൃഷ്ടിക്കാൻ ശ്രമിച്ചുവെന്നാണ് എഫ്ഐആറിൽ പറയുന്നത്.
സംഭവത്തിൽ യൂത്ത് ലീഗ് നൽകിയ പരാതിയുടെ അടിസ്ഥാനത്തിലാണ് നടപടി. മലപ്പുറം നിയോജകമണ്ഡലം യൂത്ത് ലീഗ് കമ്മിറ്റി പ്രസിഡന്റ് ഷാഫി കാടേങ്ങലാണ് പരാതി നൽകിയത്. വീഡിയോയിൽ മന്ത്രി പി.കെ. കുഞ്ഞാലിക്കുട്ടിക്കെതിരെ അശ്ലീല പരാമർശങ്ങൾ നടത്തിയതോടൊപ്പം മതസ്പർദ്ധ വളർത്തുന്ന ഉള്ളടക്കവും ഉൾപ്പെടുത്തിയിട്ടുണ്ടെന്ന് പരാതിയിൽ ആരോപിക്കുന്നു.
