കുമരകം: വൻ വികസന പദ്ധതികളുമായി കുമരകത്തെ ആരോഗ്യ സ്ഥാപനങ്ങൾ. ആരോഗ്യ സേവനങ്ങളുടെ ഗുണനിലവാരം മെച്ചപ്പെടുത്തുന്നതിനും അടിസ്ഥാന സൗകര്യങ്ങള് കൂടുതല് കാര്യക്ഷമമാക്കുന്നതിനുമായി കുമരകം പഞ്ചായത്തിന്റെ കീഴിലുള്ള ആരോഗ്യ സ്ഥാപനങ്ങളില് 6.15 കോടിയുടെ വികസന പദ്ധതികള്ക്ക് ഉടൻ തുടക്കമാകും.
15-ാം ധനകാര്യ കമ്മീഷൻ ഗ്രാന്റില് ഉള്പ്പെടുത്തി കുമരകം സാമൂഹികാരോഗ്യ കേന്ദ്രത്തില് 4.5 കോടി ചെലവില് പുതിയ ഒപി ബ്ലോക്ക് നിർമിക്കുന്നതിനും, കുമരകം സൗത്ത്, ആട്ടിപ്പീടിക, ആപ്പിത്തറ ജനകീയ ആരോഗ്യ കേന്ദ്രങ്ങള്ക്ക് 55 ലക്ഷം രൂപ വീതം ചെലവില് പുതിയ കെട്ടിടങ്ങള് നിർമിക്കുന്നതിനുമാണ് പദ്ധതി.
നിർമാണ പ്രവർത്തനങ്ങള് ഉടൻ ആരംഭിക്കുമെന്ന് അധികൃതർ അറിയിച്ചു. പദ്ധതികള് സമയബന്ധിതമായി നടപ്പാക്കി വേഗത്തില് പൂർത്തിയാക്കുന്നതിനായി ഏറ്റുമാനൂർ ബ്ലോക്ക് പഞ്ചായത്തും കുമരകം പഞ്ചായത്തും സംയുക്തമായി പ്രവർത്തിച്ചുവരികയാണ്.
സാങ്കേതിക തടസങ്ങള് പരിഹരിക്കുന്നതിനും പദ്ധതി നടത്തിപ്പിനാവശ്യമായ അധിക സാമ്പത്തിക പിന്തുണ ഉറപ്പാക്കുന്നതിനുമായി ഇരു തദ്ദേശ സ്ഥാപനങ്ങളും തങ്ങളുടെ പദ്ധതി വിഹിതത്തില്നിന്ന് കൂടുതല് ഫണ്ട് വകയിരുത്തുന്നതിനുള്ള നടപടികളും സ്വീകരിച്ചുവരുന്നു.
