മലപ്പുറം: മലപ്പുറത്തെ ഒരു കുളം ഉദ്ഘാടനത്തിന്റെ വീഡിയോയാണിപ്പോള്‍ സോഷ്യല്‍ മീഡിയയില്‍ വൈറലാകുന്നത്. മങ്കട പീച്ചാണിപ്പറമ്പ് തിരുത്തില്‍ കുളമാണ് വ്യത്യസ്തമായ ഉദ്ഘാടനത്തിലൂടെ പ്രശസ്തമായത്.
ഉദ്ഘാടനം നിർവഹിച്ചതാകട്ടെ മങ്കട എംഎല്‍എ മഞ്ഞളാംകുഴി അലിയും.
ഇന്നലെയായിരുന്നു കുളത്തിന്റെ ഉദ്ഘാടനം. അങ്ങാടിപ്പുറം പഞ്ചായത്തിലെ നാലാം വാർഡ് മെമ്പർ ഷബീർ മഞ്ഞാമ്പ്രയെ കുളത്തില്‍ തള്ളിയിട്ടായിരുന്നു എംഎല്‍എയുടെ ഉദ്ഘാടനം. മെമ്പർ കുളത്തില്‍ ചാടിയാണ് ഉദ്ഘാടനം നിർവഹിക്കുകയെന്ന് ചടങ്ങിന് മുൻപ് എംഎല്‍എ പ്രഖ്യാപിച്ചിരുന്നു. എന്നാല്‍ താൻ ചാടുകയാണെങ്കില്‍ എംഎല്‍എയും ബ്ലോക്ക് പ്രസിഡന്റും ചാടുമെന്ന് ഷബീറും മറുപടി നല്‍കി.
എന്നാല്‍ നാടമുറിച്ചതിന് പിന്നാലെ ഷബീറിന്റെ കണക്കൂക്കൂട്ടലുകളെല്ലാം തെറ്റിച്ച്‌ എംഎല്‍എയും ഒപ്പമുള്ളവരും ചേർന്ന് അദ്ദേഹത്തെ കുളത്തിലേയ്ക്ക് തള്ളിയിടുകയായിരുന്നു. കുളത്തില്‍ നിന്ന് കരയില്‍ കയറിയ ഷബീർ പെരിന്തല്‍മണ്ണ ബ്ലോക്ക് പഞ്ചായത്ത് പ്രസിഡന്റ് അഡ്വ. നജ്മ തബ്ഷിറയേയും കുളത്തിലേയ്ക്ക് തള്ളിയിട്ടു. സുരക്ഷയ്ക്കായി ട്യൂബുകള്‍ ഉള്‍പ്പെടെ കുളത്തില്‍ സജ്ജീകരിച്ച ശേഷമായിരുന്നു ഈ വെറൈറ്റി ഉദ്ഘാടനം.
