കണ്ണൂർ: കെ. സുധാകരൻ എം.പിയുടെ പേരില്‍ സോഷ്യല്‍ മീഡിയയിലൂടെ വ്യാജ പ്രചാരണം നടത്തിയ സംഭവത്തില്‍ കണ്ണൂർ സൈബർ പോലീസ് കേസെടുത്തു.
പി.ആർ രാജീവ് എന്ന ഫേസ്ബുക്ക് അക്കൗണ്ടിനെതിരെയാണ് പോലീസ് കേസ് രജിസ്റ്റർ ചെയ്തിരിക്കുന്നത്. ആഭ്യന്തരമന്ത്രിക്ക് കെ. സുധാകരൻ നല്‍കിയ പരാതിയുടെ അടിസ്ഥാനത്തിലാണ് പോലീസ് നടപടി.
മുഖ്യമന്ത്രിക്കെതിരെ കെ. സുധാകരൻ പ്രസ്താവന നടത്തിയെന്ന രീതിയിലായിരുന്നു വ്യാജ സന്ദേശങ്ങളും പോസ്റ്ററുകളും പ്രചരിപ്പിച്ചിരുന്നത്. കോണ്‍ഗ്രസ് നേതാവിന്റേതെന്ന വ്യാജേനയുള്ള വാർത്താ കാർഡുകളാണ് സോഷ്യല്‍ മീഡിയയില്‍ വ്യാപകമായി ഷെയർ ചെയ്യപ്പെട്ടത്.
മുഖ്യമന്ത്രി സ്ഥാനത്തുനിന്നും വി.ഡി. സതീശനെ മാറ്റിയില്ലെങ്കില്‍ ജനങ്ങള്‍ സർക്കാരിന് നേരെ ചീമുട്ട എറിയുമെന്നായിരുന്നു ഈ വ്യാജ പ്രചാരണത്തിന്റെ ഉള്ളടക്കം. ഈ പോസ്റ്ററുകള്‍ പാർട്ടി പ്രതിച്ഛായയെയും തന്റെ വ്യക്തിത്വത്തെയും ബാധിക്കുന്നതാണെന്ന് ചൂണ്ടിക്കാട്ടിയാണ് എം.പി പരാതി നല്‍കിയത്.
നിയമവിരുദ്ധമായ രീതിയില്‍ തനിക്കെതിരെ നടക്കുന്ന ഇത്തരം വ്യാജപ്രചാരണങ്ങള്‍ അന്വേഷിച്ച്‌ കുറ്റക്കാർക്കെതിരെ കർശന നടപടിയെടുക്കണമെന്ന് ആവശ്യപ്പെട്ട് മുൻപ് ആഭ്യന്തരമന്ത്രി രമേശ് ചെന്നിത്തലയ്ക്ക് സുധാകരൻ പരാതി നല്‍കിയിരുന്നു. ഇതിന്റെ തുടർച്ചയായാണ് സൈബർ പോലീസിന്റെ അന്വേഷണം നടന്നത്.
പോലീസ് അന്വേഷണത്തില്‍ പ്രചാരണത്തിന് പിന്നില്‍ പ്രവർത്തിച്ച ഫേസ്ബുക്ക് ഐഡി കണ്ടെത്തുകയും തുടർ നടപടികളിലേക്ക് കടക്കുകയും ചെയ്തിട്ടുണ്ട്. സോഷ്യല്‍ മീഡിയ വഴിയുള്ള അപകീർത്തികരമായ വ്യാജ പ്രചാരണങ്ങള്‍ക്കെതിരെ ശക്തമായ നിയമനടപടികള്‍ സ്വീകരിക്കാനാണ് പോലീസിന്റെ തീരുമാനം.
കെ സുധാകരന്റെ ഫേസ്ബുക്ക് പോസ്റ്റിന്റെ പൂർണ്ണരൂപം
ബഹുമാനപ്പെട്ട മുഖ്യമന്ത്രിക്കെതിരെ ഞാൻ പ്രസ്താവന നടത്തിയെന്ന തരത്തില്‍ വ്യാജ വാട്സ്ആപ്പ് സന്ദേശങ്ങളും പോസ്റ്ററുകളും പ്രചരിപ്പിക്കുന്നതായി ശ്രദ്ധയില്‍പ്പെട്ടിട്ടുണ്ട്. തികച്ചും അടിസ്ഥാനരഹിതവും വസ്തുതാവിരുദ്ധവുമായ ഇത്തരം പ്രചാരണങ്ങള്‍ ജനങ്ങളെ തെറ്റിദ്ധരിപ്പിക്കാനും വ്യക്തിഹത്യ നടത്താനുമുള്ള ബോധപൂർവമായ ശ്രമങ്ങളാണ്. ഇത്തരം വ്യാജ പ്രചാരണങ്ങള്‍ക്ക് പിന്നിലുള്ളവരെ കണ്ടെത്തി, പ്രചാരണത്തിന്റെ ഉറവിടം അന്വേഷിച്ച്‌, ബാധകമായ സൈബർ നിയമങ്ങള്‍ പ്രകാരം കർശന നടപടി സ്വീകരിക്കണമെന്ന് ആവശ്യപ്പെട്ട് ബഹുമാനപ്പെട്ട ആഭ്യന്തര വകുപ്പ് മന്ത്രിക്ക് കത്ത് നല്‍കിയിട്ടുണ്ട്. വ്യക്തിഹത്യയും വ്യാജവാർത്താ പ്രചാരണവും രാഷ്ട്രീയ പ്രവർത്തനത്തിന്റെ ഭാഗമായി അംഗീകരിക്കാനാവില്ല. അഭിപ്രായ സ്വാതന്ത്ര്യത്തിന്റെ മറവില്‍ നിയമവിരുദ്ധമായ വ്യാജപ്രചാരണങ്ങള്‍ നടത്തുന്നവർക്കെതിരെ ശക്തമായ നടപടി അനിവാര്യമാണ്. സത്യം പുറത്തുവരണം. വ്യാജപ്രചാരണങ്ങള്‍ക്കെതിരെ നിയമം ശക്തമായി പ്രവർത്തിക്കണം.
