തിരുവനന്തപുരം: ബീമാപള്ളി ഉറൂസ്, വെട്ടുകാട് പെരുന്നാൾ പ്രമാണിച്ച് സ്പെഷ്യൽ സർവീസ് ഒരുക്കി കെ.എസ്.ആർ.ടി.സി. യാത്രക്കാരുടെ തിരക്ക് പരിഗണിച്ച് രണ്ട് തീർഥാടന കേന്ദ്രങ്ങളിലേക്കുമായി സർവീസ് നടത്തുക ആകെ 45 ബസുകളായിരിക്കും.
ബീമാപള്ളി സർവീസുകൾ ക്രമീകരിച്ചിരിക്കുന്നത് കിഴക്കേക്കോട്ടയിൽ നിന്ന് ഇഞ്ചക്കൽ, വള്ളക്കടവ് വഴിയും കിഴക്കേക്കോട്ടയിൽ നിന്ന് ഇഞ്ചക്കൽ, കല്ലുമൂട് വഴിയുമാണ്.
വെട്ടുകാടേക്ക് സർവീസ് ക്രമീകരിച്ചിരിക്കുന്നത് കിഴക്കേക്കോട്ടയിൽ നിന്ന് വലിയതുറ വഴിയും പാളയം വഴിയുമുള്ള കെ.എസ്.ആർ.ടി.സിയാണ്.
ഉറൂസ് പ്രമാണിച്ച് നവംബർ 11 ബുധനാഴ്ച തിരുവനന്തപുരം നഗരസഭാ പരിധിയിൽ പ്രാദേശിക അവധി പ്രഖ്യാപിച്ചിരുന്നു.
നഗരസഭാ പരിധിയിലുള്ള എല്ലാ വിദ്യാഭ്യാസ സ്ഥാപനങ്ങൾക്കും സംസ്ഥാന സർക്കാർ ഓഫീസുകൾക്കും അവധി ബാധകമായിരിക്കും.
പത്തുദിവസം നീളുന്ന പരിപാടിയിൽ ആയിരക്കണക്കിന് വിശ്വാസികളും തീർത്ഥാടകരും പങ്കെടുക്കുമെന്നാണ് പ്രതീക്ഷിക്കുന്നത്.
ഇതിന്റെ ഭാഗമായി ഉറൂസ് നടക്കുന്ന എല്ലാ ദിവസങ്ങളിലും പൊലീസ് പിക്കറ്റുകളും നിരീക്ഷണ സംവിധാനങ്ങളും ഏർപ്പെടുത്തും.
കൂടുതൽ പൊലീസ് ഉദ്യോഗസ്ഥരെയും സന്നദ്ധപ്രവർത്തകരെയും സുരക്ഷാ ചുമതലകൾക്കായി നിയോഗിക്കും.
