തിരുവനന്തപുരം: സംസ്ഥാനത്തെ വൈദ്യുതിനിയന്ത്രണം ഒഴിവാക്കാൻ ഹിമാചല്‍പ്രദേശില്‍നിന്ന് ഉയർന്നവിലയ്ക്ക് വൈദ്യുതി വാങ്ങാൻ കെ.എസ്.ഇ.ബി. തീരുമാനം. പ്രസരണലൈനുകളില്‍ തടസ്സങ്ങളുണ്ടാകാതിരിക്കുകയും വൈദ്യുതി ഉപഭോഗത്തില്‍ അസാധാരണമായ വർധനയുണ്ടാകാതിരിക്കുകയും ചെയ്താല്‍ ഒക്ടോബറില്‍ സംസ്ഥാനത്ത് വൈദ്യുതിനിയന്ത്രണം ഏർപ്പെടുത്തേണ്ടിവരില്ലെന്നാണ് വിലയിരുത്തല്‍.
ഹിമാചല്‍ പവർ കോർപ്പറേഷനുമായി ഒക്ടോബർ മാസത്തേക്ക് 800 മെഗാവാട്ട് വൈദ്യുതി വാങ്ങുന്നതിനാണ് കരാർ. പകലും രാത്രിയുമായി വൈദ്യുതി ലഭ്യമാക്കും. യൂണിറ്റിന് 14.5 രൂപയാണ് നിലവിലെ നിരക്ക്. ഇത് 12.5 രൂപയായി കുറച്ചുനല്‍കിയാല്‍ കൂടുതല്‍ കാലത്തേക്ക് വൈദ്യുതി വാങ്ങാൻ തയ്യാറാണെന്ന് കെ.എസ്.ഇ.ബി. അറിയിച്ചിട്ടുണ്ട്. ഇതുസംബന്ധിച്ച ചർച്ചകള്‍ തുടരുകയാണ്.
സെപ്റ്റംബർ ആദ്യംതന്നെ ഹിമാചലില്‍നിന്ന് വൈദ്യുതി വാങ്ങുന്നതിനുള്ള നീക്കം കെ.എസ്.ഇ.ബി. നടത്തിയിരുന്നു. എന്നാല്‍ ഉയർന്ന നിരക്ക് കാരണം അന്ന് തീരുമാനം മാറ്റിവെച്ചു. സംസ്ഥാനത്ത് വൈദ്യുതിനിയന്ത്രണം ശക്തമായതോടെ ജനരോഷം ഉയർന്ന സാഹചര്യത്തിലാണ് വീണ്ടും ഹിമാചലില്‍നിന്ന് വൈദ്യുതി വാങ്ങാൻ തീരുമാനിച്ചത്.
ആദ്യഘട്ടത്തില്‍ പകലും രാത്രിയുമായി ഏതാണ്ട് തുല്യ അളവില്‍ വൈദ്യുതി നല്‍കാമെന്നായിരുന്നു ഹിമാചല്‍ പവർ കോർപ്പറേഷൻ അറിയിച്ചിരുന്നത്. അങ്ങനെ ലഭിച്ചിരുന്നെങ്കില്‍ ശരാശരി യൂണിറ്റ് വില 30 രൂപയോളം വരുമെന്നായിരുന്നു സർക്കാർ കണക്കുകൂട്ടല്‍. എന്നാല്‍ നിലവില്‍ ലഭിക്കുന്ന വൈദ്യുതിയുടെ 95 ശതമാനവും രാത്രിയിലാണ് എത്തുന്നത്.
ഈ മാസം മാത്രം ഹിമാചല്‍ പവർ കോർപ്പറേഷനില്‍നിന്ന് 28 കോടി യൂണിറ്റ് വൈദ്യുതി വാങ്ങാനാണ് തീരുമാനം. കേരളത്തില്‍ വൈദ്യുതി ആവശ്യകത ഏറ്റവും കൂടുതലുള്ള രാത്രിസമയത്ത് 800 മെഗാവാട്ട് വരെ ലഭ്യമാകും. യൂണിറ്റിന് 14.5 രൂപ നിരക്കില്‍ വൈദ്യുതി വാങ്ങുന്നതിലൂടെ ഈ മാസം കെ.എസ്.ഇ.ബി.യ്ക്ക് ഏകദേശം 410 കോടി രൂപയുടെ അധിക ചെലവുണ്ടാകുമെന്നാണ് കണക്ക്.
കെ.എസ്.ഇ.ബി. ഡയറക്ടർമാർ ഹിമാചലിലെത്തി നടത്തിയ ചർച്ചകള്‍ക്കുശേഷമാണ് വൈദ്യുതി വാങ്ങുന്നതിനുള്ള കരാർ അന്തിമമാക്കിയത്.
