കോഴിക്കോട്: മൂന്ന് പതിറ്റാണ്ടിലേറെ കാലം പൊലീസിനെ വെട്ടിച്ച് ഒളിവില് കഴിഞ്ഞ കെഎസ്ആര്ടിസി ബസ് കവര്ച്ചാ കേസിലെ പ്രതി ഒടുവില് അറസ്റ്റിലായി. 1990ല് തിരുവമ്പാടി–കൂമ്പാറ റൂട്ടിലോടിയ കെഎസ്ആര്ടിസി ബസില് കണ്ടക്ടര്ക്ക് നേരെ തോക്ക് ചൂണ്ടി പണം കവര്ന്ന കേസിലെ പ്രതിയായ മലപ്പുറം ഊര്ങ്ങാട്ടിരി സ്വദേശി വി.കെ. ജോസിനെയാണ് 36 വര്ഷത്തിന് ശേഷം മൈസൂരുവില്നിന്ന് തിരുവമ്പാടി പൊലീസ് പിടികൂടിയത്.
കവര്ച്ചയ്ക്ക് പിന്നാലെ കേരളം വിട്ട പ്രതി മൈസൂരുവിലെത്തി 'ശിവകുമാര്' എന്ന വ്യാജ പേരില് വിവിധ ജോലികള് ചെയ്ത് ജീവിക്കുകയായിരുന്നു. വര്ഷങ്ങളോളം ഇയാളെ കണ്ടെത്താനാകാതെ കേസ് നിലനിന്നിരുന്നു. എന്നാല് കഴിഞ്ഞ ആഴ്ച വീട്ടില് ഉണ്ടായ കുടുംബപ്രശ്നത്തെ തുടര്ന്ന് ഭാര്യ പൊലീസ് കണ്ട്രോള് റൂമില് വിളിച്ച സഹായാഭ്യര്ഥനയാണ് കേസില് അപ്രതീക്ഷിത വഴിത്തിരിവായത്.
പരാതി അന്വേഷിക്കാനെത്തിയ മൈസൂരുവിലെ നരസിംഹരാജ പൊലീസ് സ്റ്റേഷനിലെ ഉദ്യോഗസ്ഥര്ക്ക് ജോസിന്റെ പെരുമാറ്റത്തില് സംശയം തോന്നി. തുടര്ന്ന് നടത്തിയ പരിശോധനയില് കിടക്കയുടെ അടിയില്നിന്ന് തോക്കും തിരിച്ചറിയല് രേഖകളും കണ്ടെത്തി. ഇതോടെയാണ് ഇയാളുടെ യഥാര്ഥ വ്യക്തിത്വം പുറത്തുവരുകയും കേരള പൊലീസിനെ വിവരം അറിയിക്കുകയും ചെയ്തത്.
വിവരം ലഭിച്ച ഉടന് തിരുവമ്പാടി എസ്ഐയുടെ നേതൃത്വത്തിലുള്ള പൊലീസ് സംഘം മൈസൂരുവിലെത്തി പ്രതിയെ തിരിച്ചറിഞ്ഞ് അറസ്റ്റ് രേഖപ്പെടുത്തി. കോടതിയില് ഹാജരാക്കിയ ജോസിനെ റിമാന്ഡ് ചെയ്തതായി പൊലീസ് അറിയിച്ചു. 36 വര്ഷമായി ചുരുളഴിയാതെ കിടന്നിരുന്ന കേസിനാണ് ഇതോടെ നിര്ണായക വഴിത്തിരിവായത്.
