കൊല്ലം : കേരളത്തിന്റെ തനതായ മത സാഹോദര്യത്തിന്റെയും സഹിഷ്ണുതയുടെയും ജീവിക്കുന്ന പ്രതീകമായ ഫാദർ കോശി ജോർജ് വരിഞ്ഞവിളയുടെയും അദ്ദേഹത്തിന്റെ സഹധർമ്മിണി സൂസൻ കോശിയുടെയും വിവാഹ വാർഷിക ദിനത്തിൽ വേറിട്ടൊരു സ്നേഹസംഗമത്തിന് സാക്ഷ്യം വഹിച്ച് വരിഞ്ഞവിള സെൻറ് മേരീസ് പള്ളി.
ശ്രീ ശങ്കരനാരായണപുരം ക്ഷേത്രം ഭാരവാഹികളുടെ നേതൃത്വത്തിൽ നൂറിലധികം ശ്രീനാരായണീയ വിശ്വാസികളാണ് അച്ചന് സർവ്വമംഗളങ്ങളും നേർന്നുകൊണ്ട് വരിഞ്ഞവിള സെൻറ് മേരീസ് പള്ളിയിലും വരിഞ്ഞവിള ബംഗ്ലാവിലും നേരിട്ടെത്തിയത്.
പരസ്പര സ്നേഹവും സാഹോദര്യവും തകരുന്ന ഇന്നത്തെ കാലഘട്ടത്തിൽ, ഗുരുദേവന്റെ 'ഒരു ജാതി, ഒരു മതം, ഒരു ദൈവം മനുഷ്യന്' എന്ന ദർശനത്തെ അന്വർത്ഥമാക്കുന്ന മനോഹരമായ ഒരു നേർക്കാഴ്ചയായി ഈ ഒത്തുചേരൽ മാറി.
ചടങ്ങിൽ ഒളശ്ശ എസ്എൻഡിപി ശാഖാ ഭാരവാഹികളായ ഷാജിമോൻ (പ്രസിഡന്റ്), കെകെ കുട്ടൻ (വൈസ് പ്രസിഡന്റ്), സജിമോൻ വട്ടുകളം (സെക്രട്ടറി ഇൻ ചാർജ്), ഗീതാ അനിൽകുമാർ (വനിതാസംഘം പ്രസിഡന്റ്), പുഷ്പാ സുഗതൻ (വനിതാസംഘംസെക്രട്ടറി), ശാഖാമാനേജിംഗ് കമ്മറ്റിയംഗങ്ങളായ ജിനുമോൻ കൊരട്ടിയിൽ, ദിലീപ് നെടും പുറത്ത്, സൂരജ് മാലിയിൽ, മനോജ് കയ്യത്രമാലി, കുടുംബയോഗം കൺവീനർമാരായ സുഗതൻ,ഷൈലജസനു, ആര്യ സജീവ് എന്നിവർ ചേർന്ന് അച്ഛനെയും ഭാര്യയെയും പൊന്നാട അണിയിച്ച് ആദരിക്കുകയും, ക്ഷേത്രത്തിന്റെയും ശാഖയുടെയും സ്നേഹോപഹാരം സമർപ്പിക്കുകയും ചെയ്തു.
പൊതുപ്രവർത്തന രംഗത്തും ജീവകാരുണ്യ മേഖലയിലും അച്ചൻ നൽകുന്ന വലിയ പിന്തുണയ്ക്കുള്ള നന്ദികൂടിയായി ഈ ആദരവ്. ശിവഗിരി തീർത്ഥാടക സംഘം ചെയർമാൻ എൻ ജയചന്ദ്രൻ, ജനറൽ സെക്രട്ടറി ഉളിയനാട് വിജയൻ എന്നിവർ ചടങ്ങിൽ പങ്കെടുത്തു ആശംസകൾ നേർന്നു. തുടർന്ന് സെൻ്റ് മേരീസ് ദേവാലയത്തിൽ 'ദൈവദശക' പ്രാർത്ഥനയും ചൊല്ലി ചടങ്ങുകൾക്ക് ശുഭസമാപ്തി കുറിച്ചു.
