കോട്ടയം: കോട്ടയം മെഡിക്കല്‍ കോളജ് ആശുപത്രിയില്‍ ഹെർണിയ ശസ്ത്രക്രിയയ്ക്ക് ശേഷം ചികിത്സയിലിരിക്കെ വീട്ടമ്മ മരിച്ച സംഭവത്തില്‍ അന്വേഷണം ആരംഭിച്ചു.
ചങ്ങനാശേരി പുത്തൂര്‍പ്പള്ളി പുതുപറമ്പില്‍ ഹസീന (49)യുടെ മരണത്തെക്കുറിച്ച്‌ അന്വേഷിക്കാൻ നിയോഗിച്ച മൂന്നംഗ സമിതി ആശുപത്രിയിലെത്തി പരിശോധന നടത്തി.
ചികിത്സ നിഷേധിച്ചതായി ആരോപിച്ച്‌ ഹസീനയുടെ ബന്ധുക്കള്‍ ആരോഗ്യമന്ത്രിക്ക് പരാതി നല്‍കിയിരുന്നു.
ഇതിന്റെ അടിസ്ഥാനത്തിലാണ് ആരോഗ്യ മന്ത്രി അന്വേഷണ സമിതിയെ നിയോഗിച്ചത്. മരിച്ച വീട്ടമ്മയുടെ ബന്ധുക്കള്‍, ചികിത്സിച്ച ഡോക്ടർ, നഴ്‌സുമാർ എന്നിവരില്‍നിന്ന് സമിതി മൊഴിയെടുത്തു.
ആശുപത്രി അധികൃതർ ചികിത്സാരേഖകളും അന്വേഷണ സമിതിക്ക് കൈമാറി.
തിരുവനന്തപുരം മെഡിക്കല്‍ കോളജ് സർജറി വിഭാഗം പ്രഫ.ഡോ.പി.കെ തോമസ്, തൃശൂർ മെഡിക്കല്‍ കോളജ് സർജറി വിഭാഗം പ്രഫ.ഡോ.സി.രവീന്ദ്രൻ, തിരുവനന്തപുരം മെഡിക്കല്‍ കോളജ് ഫോറൻസിക് മെഡിസിൻ വിഭാഗം പ്രഫ.ഡോ. എസ്.ഷാരിജ എന്നിവരാണ് അന്വേഷണ സമിതി അംഗങ്ങള്‍.
കഴിഞ്ഞ മാസം 18-നാണ് ഹസീനയെ ഹെര്‍ണിയ ഓപ്പറേഷനായി കോട്ടയം മെഡിക്കല്‍ കോളജില്‍ പ്രവേശിപ്പിച്ചത്.
ശസ്ത്രക്രിയയ്ക്കു ശേഷം 25ന് ഇവരെ ഡിസ്ചാര്‍ജ് ചെയ്തു. കടുത്ത വയറുവേദനയും ശരീരം തളരുന്ന അവസ്ഥയും ഉള്ളതിനാല്‍ ഡിസ്ചാര്‍ജ് ചെയ്യരുതെന്നു കുടുംബം അഭ്യര്‍ത്ഥിച്ചെങ്കിലും പാരസെറ്റാമോള്‍ നല്‍കി നിര്‍ബന്ധപൂര്‍വം തിരിച്ചയക്കുകയായിരുന്നു.
തുടര്‍ന്ന് 28-ന് ഓപ്പറേഷന്‍ ചെയ്ത ഭാഗത്തുനിന്നു പഴുപ്പും രക്തവും വന്ന് അവസ്ഥ ഗുരുതരമായപ്പോള്‍ വീണ്ടും പ്രവേശിപ്പിച്ചെങ്കിലും മുതിര്‍ന്ന ഡോക്ടര്‍മാരുടെ സേവനം ലഭ്യമായില്ലെന്നും ജൂനിയര്‍ ഡോക്ടര്‍മാരാണു ചികിത്സിച്ചത്.
ഒടുവില്‍ രണ്ടാം തീയതി ചികിത്സാപിഴവിനെ തുടര്‍ന്നു ഹസീന മരണപ്പെടുകയായിരുന്നു.
