റ്റുമാനൂര്‍: ഏറ്റുമാനൂര്‍ റെയില്‍വേ സ്‌റ്റേഷന്‍ പരിസരത്ത്‌ തെരുവ്‌ നായ ശല്യം രൂക്ഷമാകുന്നു. രാത്രിയില്‍ ട്രെയിനില്‍ വന്നിറങ്ങുന്നവരെ നായ ആക്രമിക്കുന്നതു പതിവായിരിക്കുകയാണ്‌.
വൈകുന്നേരങ്ങളില്‍ മഴയുള്ളപ്പോള്‍ നായകള്‍ കൂട്ടത്തോടെ പ്ലാറ്റ്‌ ഫോമിലും പരിസരത്തും തമ്പടിച്ചിരിക്കുകയാണ്‌. പാര്‍ക്കു ചെയ്‌തിരിക്കുന്ന വാഹനങ്ങള്‍ക്ക്‌ അരികിലും നായ കൂട്ടത്തോടെ എത്തുന്നുണ്ട്‌. ആഹാരസാധനങ്ങള്‍ റെയില്‍വേ സ്‌റ്റേഷന്‍ പരിസരത്ത്‌ അലക്ഷ്യമായി ഇടുന്നതാണു നായ ശല്യം വര്‍ധിക്കാന്‍ കാരണം. അതിരമ്പുഴ റോഡിലും ഐ.ടി.എ പരിസരത്തും ഉള്ള വ്യാപാരസ്‌ഥാപനങ്ങളിലും പെട്രോള്‍ പമ്പിലും നായശല്യം കൂടിയിട്ടുണ്ടെന്നു വ്യാപാരികള്‍ പറഞ്ഞു. മാര്‍ക്കറ്റ്‌ പരിസരത്തു ഹോട്ടലുകളില്‍ നിന്നു പാഴായ ആഹാരം നായകള്‍ക്കു കൊടുക്കുന്നതാണു നായ ശല്യം വര്‍ധിക്കാന്‍ കാരണമെന്നു പരിസരവാസികള്‍ പറഞ്ഞു. നായകളെ നീയന്ത്രിക്കാന്‍ പഞ്ചായത്ത്‌ അടിയന്തിരമായി ഇടപെടണമെന്നാണു യാത്രക്കാരുടെയും വ്യാപാരികളുടെയും ആവശ്യം.
