കോട്ടയം: ജില്ലയുടെ വിവിധ ഭാഗങ്ങളിൽ വെള്ളക്കെട്ട് രൂക്ഷമായതോടെ നിരവധി റോഡുകളിൽ ഗതാഗതം തടസ്സപ്പെട്ടു.
മണർകാട്–ഏറ്റുമാനൂർ ബൈപ്പാസ് റോഡിലെ പാലമുറി, നാലുമണിക്കാറ്റ് ഭാഗങ്ങളിലും കോട്ടമുറി–തൂത്തുട്ടി റോഡിലെ പറമ്പുകരയിലും കാവുംപടി–താന്നിക്കപ്പടി റൂട്ടിലെ മേത്താപറമ്പിലും വെള്ളം കയറി ഗതാഗതം തടസ്സപ്പെട്ടു. വടവാതൂർ–മോസ്കോ റൂട്ടിലെ തേമ്പ്രവാൽക്കടവ്, മോസ്കോ കവല–പൈപ്പ്ലൈൻ റോഡ്, ഇറഞ്ഞാൽ–മോസ്കോ റോഡ് എന്നിവിടങ്ങളിലും സമാന സ്ഥിതിയാണ്.
ഏറ്റുമാനൂർ–മണർകാട്, ഏറ്റുമാനൂർ–അയർക്കുന്നം റോഡുകളിലും വെള്ളക്കെട്ട് ഗതാഗതത്തെ ബാധിച്ചു. കണ്ണപുര–പേരൂർ റോഡിൽ നിലവിൽ ഇരുചക്രവാഹനങ്ങൾക്ക് മാത്രമാണ് കടന്നുപോകാൻ കഴിയുന്നത്.
പുതുപ്പള്ളി മേഖലയിലും വെള്ളക്കെട്ട് മൂലം ഗതാഗതം തടസ്സപ്പെട്ടു. പുതുപ്പള്ളി–എരമല്ലൂർ–പരുത്തുംപാറ റോഡിലെ അമ്പാട്ടുകടവ് ഭാഗത്ത് ഗതാഗതം പൂർണമായും നിലച്ചു.
കൊട്ടാരത്തിൽ കടവ് റോഡിൽ പുതുപ്പള്ളി ഭാഗത്തും പാലൂർപടി–ചെമ്മാരപ്പള്ളി വഴിയുള്ള പുതുപ്പള്ളി റോഡിലും ഗതാഗതം തടസ്സപ്പെട്ടു.
പരുത്തുംപാറ–പുതുപ്പള്ളി റൂട്ടിലും അമ്പാട്ടുകടവ് ഭാഗത്ത് വെള്ളം കയറിയതോടെ വാഹന ഗതാഗതം പൂർണമായി നിലച്ചു.
മണിപ്പുഴ–കോട്ടയം ഈരയിൽക്കടവ് ജംഗ്ഷൻ ബൈപ്പാസ് റോഡിലും വെള്ളം കയറി ഗതാഗതം പൂർണമായും തടസ്സപ്പെട്ടു.
കുമാരകം–കോട്ടയം റോഡിലെ കടത്തുകടവ് ഭാഗത്തും വാഹന ഗതാഗതം തടസ്സപ്പെട്ടിട്ടുണ്ട്.
കോട്ടയം–തിരുവാർപ്പ് റോഡിൽ വലിയ വാഹനങ്ങൾക്ക് മാത്രമാണ് നിലവിൽ യാത്രാനുമതി.
വെള്ളൂർ–വെട്ടിക്കാട്ടുമുക്ക് റോഡിൽ പുതിയ റോഡ് ഭാഗത്ത്, തടി മില്ലിന് സമീപം വെള്ളം കയറിയതിനാൽ ചെറുവാഹനങ്ങളുടെ യാത്ര പ്രയാസമേറിയിട്ടുണ്ട്.
ഏറ്റുമാനൂർ–ആറുമാനൂർ–അയർക്കുന്നം റോഡിലെ ആറുമാനൂർ ഭാഗത്തും പൂവത്തുംമൂട്–നീറിക്കാട്, പുന്നത്തറ–പുളിഞ്ചോട് റോഡുകളിലും വെള്ളം കയറി.
നീണ്ടൂർ–കല്ലറ റോഡിൽ നിലവിൽ ഇരുചക്രവാഹനങ്ങൾക്ക് കടന്നുപോകാനാകുന്നുണ്ട്.
വിവിധ പ്രദേശങ്ങളിലെ ബൈറോഡുകളിലും വെള്ളക്കെട്ട്
ജില്ലയിലെ വിവിധ പഞ്ചായത്തുകളിലായി നിരവധി ബൈറോഡുകളിലും വെള്ളം കയറിയിട്ടുണ്ട്.
വടയാർ വില്ലേജ് പരിധിയിലെ തലയോലപ്പറമ്പ്–പഴംപെട്ടി–എഴുമാന്തുരുത്ത്, ഇളങ്കാവ്–മുട്ടുങ്കൽ–തേവലക്കാട്–മൂത്താക്കോണിക്കടവ്, തേവലക്കാട്–മുണ്ടോടി–മനക്കരി, മാത്താനം–കുറുന്തറ, കോരിക്കൽ–മാക്കോക്കുഴി റോഡുകളിലാണ് വെള്ളക്കെട്ട് റിപ്പോർട്ട് ചെയ്തിരിക്കുന്നത്.
കുലശേഖരമംഗലം വില്ലേജിൽ പാലംകടവ് ടോൾ റോഡ്, ചുങ്കം–പൊട്ടൻചിറ, ചുങ്കം–പാട്ടശ്ശേരി, വാക്കയിൽ–അരങ്ങന്താനം, ചിറേക്കടവ്–പോത്താറപ്പടി റോഡുകളിലും വെള്ളം കയറിയിട്ടുണ്ട്.
ചെമ്പ് വില്ലേജിലെ തുരുത്തുമ്മ–പുല്ലുകാട്ടുതട റോഡിലും വെച്ചൂർ പഞ്ചായത്തിലെ മറ്റം–പെരുന്തുരുത്ത്, മറ്റം–ഔട്ട്പോസ്റ്റ്, കൈപ്പമൊട്ട്–മഞ്ചാടിക്കരി റോഡുകളിലും ഗതാഗതത്തെ വെള്ളക്കെട്ട് ബാധിച്ചു.
കല്ലറ പഞ്ചായത്തിലെ പറവൻതുരുത്ത്–കല്ലറ, മുണ്ടാർ–കാപിക്കാട്, കല്ലുപുര–വാക്കേത്തറ, ചേന്തുരുത്ത്–ചന്തപ്പാലം, 110–മേറ്റിത്തറ റോഡുകളിലും വെള്ളം കയറിയിട്ടുണ്ട്.
കടുത്തുരുത്തി പഞ്ചായത്തിലെ മാംഗോ മെഡോസ്–പുലിത്തുറ, മലപ്പുറം പള്ളി–എഴുമാന്തുരുത്ത് റോഡുകളിലും ഉദയനാപുരം പഞ്ചായത്തിലെ നക്കംതുരുത്ത്–വളക്കം, വാഴമന–മുട്ടുങ്കൽ, വടയാർ–മുട്ടുങ്കൽ, വാക്കത്തറ–കെ.വി. കനാൽ റോഡുകളിലും വെള്ളക്കെട്ട് റിപ്പോർട്ട് ചെയ്തു.
ടി.വി.പുരം പഞ്ചായത്ത് പരിധിയിലെ അപ്പയ്ക്കൽ–ചെമത്തുകര, പൈനുക്കൽ–വാതപ്പള്ളി റോഡുകളിലും വെള്ളം കയറിയിട്ടുണ്ട്.
