കോട്ടയം:ഉൽപാദന ചിലവിന് ആനുപാതികമായി നെല്ല് വില വർദ്ധിപ്പിക്കുവാൻ സർക്കാർ തയ്യാറാകണമെന്ന് കേരള കോൺഗ്രസ് (എം )സംസ്ഥാന ജനറൽ സെക്രട്ടറി ഡോ. സ്റ്റീഫൻ ജോർജ് ആവശ്യപ്പെട്ടു.
കോട്ടയത്ത് കേരള കോൺഗ്രസ് (എം) സംസ്ഥാന കമ്മിറ്റി ഓഫീസിൽ ചേർന്ന കേരള നെൽ കർഷക യൂണിയൻ (എം ) സംസ്ഥാന നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം.
വിതക്കാലത്തിനു മുമ്പ് കർഷകർക്ക് നെൽവിത്ത് എത്തിക്കുവാൻ സർക്കാർ തയ്യാറാകണം.
സർക്കാർ ഉടമസ്ഥതയിലുള്ള വൈക്കത്തെ കുട്ടനാട് റൈസ് മിൽ അടച്ചുപൂട്ടി സ്വകാര്യ മേഖലയിലെ മില്ലുകളെ സഹായിക്കുവാനുള്ള നീക്കത്തിൽ നിന്ന് സർക്കാർ പിന്മാറണം എന്നും അദ്ദേഹം ആവശ്യപ്പെട്ടു.
ബെന്നി സി. പൊന്നാരം യോഗത്തിൽ അധ്യക്ഷത വഹിച്ചു.
ജോബ് മൈക്കിൾ എക്സ് എംഎൽഎ മുഖ്യപ്രഭാഷണം നടത്തി.
ഷെയിൻ ജോസഫ് കാരയ്ക്കൽ, ജോസുകുട്ടി കവലക്കൽ, ജോസ് ആന്റണി അറയിൽ, രാജേഷ് ഇലഞ്ഞി വീട്ടിൽ, തോമസ് ജോർജ് പണിക്കരോടം, ജോർജ് പണ്ടാരക്കുളം എന്നിവർ പ്രസംഗിച്ചു.
പുതിയ സംസ്ഥാന പ്രസിഡന്റായി ഷെയിൻ ജോസഫ് കാരക്കലിനെയും, ജനറൽ സെക്രട്ടറിയായി ജോസുകുട്ടി കവലയ്ക്കലിനെയും തെരഞ്ഞെടുത്തു.
