കോന്നി: ആരോഗ്യമന്ത്രി കെ. മുരളീധരന്റെ കര്‍ശന നിര്‍ദ്ദേശത്തെ തുടര്‍ന്ന് കോന്നി സര്‍ക്കാര്‍ നഴ്സിങ് കോളേജില്‍ സീനിയര്‍ സൂപ്രണ്ടായി പ്രവേശിച്ച ബി.ജെ.പി.
നേതാവ് രതീഷ് ആര്‍. നായരെ സര്‍വീസില്‍ നിന്ന് പിരിച്ചുവിട്ടു. എല്ലാ സര്‍വീസ് മാനദണ്ഡങ്ങളും കാറ്റില്‍പ്പറത്തി നടപ്പിലാക്കിയ വിവാദ നിയമനം റദ്ദാക്കാനും ഇയാള്‍ക്കെതിരെ ഉടനടി നടപടി സ്വീകരിക്കാനും മന്ത്രിയുടെ ഓഫീസ് നിര്‍ദ്ദേശം നല്‍കുകയായിരുന്നു.
കോണ്‍ഗ്രസ് - ബി.ജെ.പി. ഒത്തുകളിയുടെ ഭാഗമായി ആരോഗ്യവകുപ്പിന് കീഴിലുള്ള കോന്നി നഴ്സിങ് കോളേജില്‍ ബി.ജെ.പി. നേതാവിന് ഉന്നത തസ്തിക നല്‍കിയെന്ന വാര്‍ത്ത വലിയ വിവാദങ്ങള്‍ക്കാണ് വഴിവെച്ചിരുന്നത്. ബി.ജെ.പി. തിരുവനന്തപുരം ജില്ലാ പെന്‍ഷനേഴ്‌സ് സെല്‍ കണ്‍വീനറായ രതീഷ് ആര്‍. നായരെയാണ് മാനദണ്ഡങ്ങള്‍ മറികടന്ന് സീനിയര്‍ സൂപ്രണ്ടായി നിയമിച്ചിരുന്നത്. ഇയാള്‍ സര്‍വീസിലിരിക്കെ ബി.ജെ.പി. അനുകൂല സംഘടനയായ എന്‍.ജി.ഒ. സംഘിന്റെ സംസ്ഥാന കമ്മിറ്റി അംഗമായി പ്രവര്‍ത്തിച്ചിട്ടുള്ള വ്യക്തിയാണ്.
മതിയായ യോഗ്യതയുള്ളവരെയും അര്‍ഹരായ ഉദ്യോഗസ്ഥരെയും ബോധപൂര്‍വ്വം തന്തപൂര്‍വ്വം തള്ളിക്കളഞ്ഞാണ് ഈ ഉന്നത തസ്തികയിലേക്ക് ബി.ജെ.പി. നേതാവിനെ നിയമിച്ചത്. നിയമനം വന്‍ അഴിമതിയാണെന്നും സര്‍ക്കാര്‍ സ്ഥാപനങ്ങളില്‍ ആര്‍.എസ്.എസ്. ആശയങ്ങള്‍ക്ക് പ്രചാരം നല്‍കാനാണ് ഇത്തരമൊരു നീക്കമെന്നും ആരോപിച്ച്‌ വിവിധ വിഭാഗങ്ങള്‍ രംഗത്തെത്തിയിരുന്നു.
നിയമനത്തിന് പിന്നില്‍ ആരോഗ്യവകുപ്പിലെ ചില ഉന്നത ഉദ്യോഗസ്ഥരുടെയും പ്രാദേശിക കോണ്‍ഗ്രസ് നേതാക്കളുടെയും വഴിവിട്ട ഇടപെടലുകള്‍ ഉണ്ടെന്ന ആക്ഷേപം ശക്തമായിരുന്നു. വിഷയത്തില്‍ ഭരണസിരാകേന്ദ്രങ്ങളില്‍ നിന്നും പാര്‍ട്ടി അണികളില്‍ നിന്നും പ്രതിഷേധം ഇരമ്പിയതോടെയാണ് വിഷയത്തില്‍ ആരോഗ്യമന്ത്രി കെ. മുരളീധരന്‍ നേരിട്ട് ഇടപെടാന്‍ നിര്‍ബന്ധിതനായത്.
നിയമനത്തില്‍ ഗുരുതര വീഴ്ചയും ചട്ടലംഘനവും സംഭവിച്ചിട്ടുണ്ടെന്ന് കണ്ടെത്തിയതിനെ തുടര്‍ന്നാണ് രതീഷ് ആര്‍. നായരെ അടിയന്തരമായി ചുമതലകളില്‍ നിന്ന് നീക്കം ചെയ്യാനും പിരിച്ചുവിടാനും മന്ത്രി ഉദ്യോഗസ്ഥര്‍ക്ക് നേരിട്ട് ഉത്തരവ് നല്‍കിയത്. ഭരണപരമായ കാര്യങ്ങളില്‍ ഇത്തരം വീഴ്ചകള്‍ അനുവദിക്കില്ലെന്നും മന്ത്രി വ്യക്തമാക്കി.
ബി.ജെ.പി. നേതാവിന് ഉന്നത സ്ഥാനം നല്‍കിയ സംഭവത്തില്‍ കോണ്‍ഗ്രസിനുള്ളില്‍ തന്നെ വലിയ തരത്തിലുള്ള അമര്‍ഷവും ഭിന്നതയും ഉടലെടുത്തിരുന്നു. ആരോഗ്യവകുപ്പിലെ കോണ്‍ഗ്രസ് അനുകൂല സര്‍വീസ് സംഘടനകളും നിയമനത്തിനെതിരെ കടുത്ത വിയോജിപ്പ് പ്രകടിപ്പിച്ചിരുന്നെങ്കിലും തുടക്കത്തില്‍ തുറന്നെതിര്‍ക്കാന്‍ ഭയക്കുകയായിരുന്നു
സര്‍ക്കാര്‍ സ്ഥാപനങ്ങളില്‍ ബി.ജെ.പി.-ആര്‍.എസ്.എസ്. പശ്ചാത്തലമുള്ളവരെ വഴിവിട്ട് നിയമിക്കുന്നത് തടയണമെന്നും ഇതിനു പിന്നില്‍ പ്രവര്‍ത്തിച്ച ഉദ്യോഗസ്ഥര്‍ക്കെതിരെ വകുപ്പുതല അന്വേഷണം വേണമെന്നും വിവിധ സംഘടനകള്‍ ആവശ്യപ്പെട്ടിട്ടുണ്ട്.
അനധികൃത നിയമനത്തിന് പിന്നില്‍ പ്രവര്‍ത്തിച്ച ഇടനിലക്കാരെയും ഉദ്യോഗസ്ഥരെയും കുറിച്ച്‌ അന്വേഷിക്കാനും മന്ത്രി കെ. മുരളീധരന്‍ നിര്‍ദ്ദേശം നല്‍കിയിട്ടുണ്ട്. ഭാവിയില്‍ ഇത്തരം നിയമനങ്ങള്‍ ആവര്‍ത്തിക്കാതിരിക്കാന്‍ തസ്തികകളിലെ നിയമനങ്ങള്‍ സുതാര്യമാക്കുമെന്നും അധികൃതര്‍ അറിയിച്ചു.
മന്ത്രിയുടെ ദ്രുതഗതിയിലുള്ള ഇടപെടലിലൂടെ രതീഷ് ആര്‍. നായരുടെ നിയമനം റദ്ദാക്കിയത് വന്‍ രാഷ്ട്രീയ വിവാദങ്ങള്‍ക്കാണ് താത്കാലിക ശമനമുണ്ടാക്കിയിരിക്കുന്നത്. സംഭവത്തില്‍ ഉത്തരവാദികളായവര്‍ക്കെതിരെ കൂടുതല്‍ കര്‍ശന നടപടികളിലേക്ക് കടക്കാനാണ് ആരോഗ്യവകുപ്പിന്റെ നീക്കം.
