കൊല്ലം: കൊല്ലം-ചെങ്കോട്ട പാതയില്‍ മെമു സർവീസുകള്‍ അടിയന്തിരമായി ആരംഭിക്കണമെന്നുള്ള ആവശ്യം നടപ്പാക്കുമെന്ന് റെയില്‍വേ അധികൃതർ ഉറപ്പ് നല്‍കിയതായി എൻ.കെ.പ്രേമചന്ദ്രൻ എം.പി അറിയിച്ചു.
ഗേജ് മാറ്റവും വൈദ്യുതീകരണവും കഴിഞ്ഞതിന് ശേഷവും പാതയില്‍ പകല്‍ സമയത്ത് പ്രദേശവാസികള്‍ക്ക് യാത്ര ചെയ്യാൻ സൗകര്യപ്രദമായ ട്രെയിനുകള്‍ ഇല്ലാത്തത് പരിഹരിക്കാൻ അടിയന്തിര നടപടി വേണമെന്ന് ആവശ്യപ്പെട്ടതിനെ തുടർന്നാണ് നടപടി.
നാഗർകോവിലില്‍ നിന്നും തിരുനെല്‍വേലിയില്‍ നിന്നും ചെന്നൈയിലേയ്ക്കുളള വന്ദേഭാരത് എകസ്പ്രസുകളുടെ കണക്ഷൻ കിട്ടുന്ന നിലയില്‍ കൊല്ലം തിരുവനെല്‍വേലി ട്രെയിൻ സർവീസ് പുനരാരംഭിക്കണമെന്ന ആവശ്യത്തിന് മുൻഗണന നല്‍കിയിട്ടുണ്ടെന്നും റയില്‍വേ അധികൃതർ അറിയിച്ചിട്ടുണ്ട്.
പുതിയ മെമു റേക്കുകള്‍ കൊല്ലത്തിന് അനുവദിക്കുമ്പോള്‍ കൊല്ലം ചെങ്കോട്ട പാതയില്‍ മെമു സർവീസ് ആരംഭിക്കാനുള്ള നടപടികളാണ് ത്വരിതപ്പെടുത്തുന്നത്. കൂടുതല്‍ മെമു റേക്കുകള്‍ ദക്ഷിണ റെയില്‍വേ റയില്‍വേ ബോർഡിനോട് ആവശ്യപ്പെട്ടിട്ടുണ്ടെന്നും എം.പി അറിയിച്ചു.
