തിരുവനന്തപുരം: പ്രശസ്ത സ്റ്റില്‍ ഫോട്ടോഗ്രാഫര്‍ കൊല്ലം മോഹന് അന്തരിച്ചു.
കുടുംബത്തോടൊപ്പം യാത്ര ചെയ്യുന്നതിനിടെ മാര്‍ത്താണ്ഡത്ത് വെച്ച് ട്രെയിനില്‍ നിന്ന് കാല്‍വഴുതി വീഴുകയായിരുന്നു.
ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
കേരളശബ്ദം, നാന സിനിമാ വാരിക തുടങ്ങിയ പ്രമുഖ പ്രസിദ്ധീകരണങ്ങളില്‍ ദീര്‍ഘകാലം ഫോട്ടോഗ്രാഫറായി പ്രവര്‍ത്തിച്ച വ്യക്തിയാണ് കൊല്ലം മോഹന്. മലയാള സിനിമയിലെ ശ്രദ്ധേയമായ നിരവധി ചിത്രങ്ങള്‍ക്ക് പിന്നിലും അദ്ദേഹത്തിന്റെ ക്യാമറക്കണ്ണുകളുണ്ടായിരുന്നു.
അടൂര്‍ ഗോപാലകൃഷ്ണന്‍ സംവിധാനം ചെയ്ത മതിലുകള്‍, മുഖാമുഖം, അനന്തരം തുടങ്ങിയ സിനിമകളുടെ സ്റ്റില്‍ ഫോട്ടോഗ്രാഫറായി പ്രവര്‍ത്തിച്ചിട്ടുണ്ട്. സിനിമകളിലെ കഥാപാത്രങ്ങളെയും രംഗങ്ങളെയും നിശ്ചലചിത്രങ്ങളിലൂടെ മനോഹരമായി പകര്‍ത്തിയ അദ്ദേഹത്തിന്റെ പ്രവര്‍ത്തനം ശ്രദ്ധേയമായിരുന്നു.
ഫോട്ടോഗ്രാഫിക്ക് പുറമെ അഭിനയരംഗത്തും അദ്ദേഹം സാന്നിധ്യമറിയിച്ചു. ലോഹിതദാസ് സംവിധാനം ചെയ്ത സൂത്രധാരന്‍ എന്ന സിനിമയില്‍ ചെറിയൊരു വേഷത്തിലും അഭിനയിച്ചിട്ടുണ്ട്.
കൊല്ലം കുരീപ്പുഴ മണല്‍ ശിവക്ഷേത്രത്തിന് സമീപമാണ് വീട്. അദ്ദേഹത്തിന്റെ വിയോഗം സിനിമാ-ഫോട്ടോഗ്രാഫി മേഖലയില്‍ വലിയ നഷ്ടമാണ്.
