തിരുവനന്തപുരം: മെസ്സിയുടെ പേരില്‍ നടന്ന തട്ടിപ്പ് കേസില്‍ മുന്‍ കായിക മന്ത്രി വി. അബ്ദുറഹിമാന്‍ പ്രതി പട്ടികയിലേക്ക്.
ആഭ്യന്തര വകുപ്പിന്റെ ഉത്തരവ് ലഭിച്ചാല്‍ ഉടന്‍ എസ്‌ഐടി പ്രതിചേര്‍ക്കും. അഴിമതി നിരോധന നിയമപ്രകാരമുള്ള വകുപ്പുകള്‍ ചുമത്തും.
അബ്ദുറഹിമാന്‍ ഔദ്യോഗിക പദവി ദുരുപയോഗം ചെയ്തെന്നാണ് അന്വേഷണ സംഘത്തിന്റെ കണ്ടെത്തല്‍.
ഇതിനെ രാഷ്ട്രീയമായും നിയമപരമായും നേരിടാനുള്ള ഒരുക്കത്തിലാണ് സിപിഎം.
മെസ്സി തട്ടിപ്പില്‍ വി. അബ്ദുറഹിമാനെ പ്രതിചേര്‍ക്കാന്‍ ഗവര്‍ണര്‍ അനുമതി നല്‍കിയിരുന്നു. വി. അബ്ദുറഹിമാനൊപ്പം സ്‌പോര്‍ട്‌സ് കൗണ്‍സില്‍ മുന്‍ പ്രസിഡന്റ് ഷറഫ് അലിയെയും അബ്ദുറഹിമാന്റെ പേഴ്‌സണല്‍ സ്റ്റാഫ് അംഗത്തെയും പ്രതിചേര്‍ക്കാനാണ് അന്വേഷണ സംഘത്തിന് അനുമതി ലഭിച്ചത്.
ഇവരെ പ്രതിചേര്‍ക്കുന്നതിനായി പൊലീസ് നല്‍കിയ അപേക്ഷയിലാണ് ഗവര്‍ണര്‍ അനുമതി നല്‍കിയത്. കേസില്‍ മുന്‍മന്ത്രിയുടെ പങ്ക് സംബന്ധിച്ച്‌ അന്വേഷണ സംഘം നേരത്തെ തന്നെ അന്വേഷണം നടത്തിയിരുന്നു.
സര്‍ക്കാര്‍ നയപരമായ തീരുമാനത്തിന്റെ ഭാഗമായാണ് മെസ്സിയെ കേരളത്തിലെത്തിക്കാന്‍ തീരുമാനിച്ചതെന്നതിനാല്‍ മുന്‍ മന്ത്രിയെ പ്രതിചേര്‍ക്കാന്‍ ഗവര്‍ണറുടെ അനുമതി തേടുന്നതാണ് ഉചിതമെന്നായിരുന്നു നിയമോപദേശം. ഇതിന്റെ അടിസ്ഥാനത്തില്‍ സംസ്ഥാന ആഭ്യന്തര വകുപ്പ് ഗവര്‍ണര്‍ക്ക് അപേക്ഷ നല്‍കുകയായിരുന്നു. ഫയലുകള്‍ വിശദമായി പരിശോധിച്ച ശേഷമാണ് ഗവര്‍ണര്‍ അനുമതി നല്‍കിയത്.
പദവി ദുരുപയോഗം ചെയ്ത് ബന്ധപ്പെട്ട കമ്പനിക്ക് വഴിവിട്ട സഹായങ്ങള്‍ നല്‍കിയെന്നതാണ് വി. അബ്ദുറഹിമാനെതിരായ പ്രധാന ആരോപണം. തട്ടിപ്പിന്റെ ആസൂത്രണത്തിലും ഗൂഢാലോചനയിലും മുന്‍മന്ത്രിക്ക് പങ്കുണ്ടെന്നാണ് അന്വേഷണ സംഘത്തിന്റെ പ്രാഥമിക നിഗമനം.
