കൊല്ലം: വീട്ടിനുള്ളില്‍ ഭക്ഷണം കഴിച്ചു കൊണ്ടിരുന്ന അമ്മയ്ക്കും കുഞ്ഞിനും ഇടിമിന്നലേറ്റു.
കുണ്ടറ നെടുമ്പനയിലാണ് സംഭവം. പത്താം വാർഡ് ശാസ്താംപൊയ്ക ഉഗ്രാംകുന്ന് അജിത് ഭവനില്‍ അജിത്തിന്‍റെ ഭാര്യ ശ്രീദേവി (28), മകൻ ആദിദേവ് (5) എന്നിവർക്കാണ് പരിക്കേറ്റത്.
അമ്മയ്ക്കും കുഞ്ഞിനും പൊള്ളലേറ്റിട്ടുണ്ട്. കുഞ്ഞിന് ദേഹമാസകലവും പൊള്ളലേറ്റു. അമ്മയ്ക്ക് വയറിന്‍റെ ഭാഗത്താണ് പൊള്ളല്‍.
പരിക്കേറ്റ ഇരുവരെയും തിരുവനന്തപുരം എസ്‌എടി ആശുപത്രിയില്‍ പ്രവേശിപ്പിച്ചു.
ഇടിമിന്നലില്‍ വീട്ടിലെ സ്വിച്ച്‌ ബോർഡുകള്‍ പൊട്ടിത്തെറിക്കുകയും വയറുകള്‍ കത്തിനശിക്കുകയും ചെയ്തിട്ടുണ്ട്. ഇവരുടെ വീടിന്‍റെ ചുവരിനും കിണറിനും തകരാർ സംഭവിച്ചു.
ശ്രീദേവിയും ആദിദേവും മറ്റ് രണ്ട് മക്കളും ഭർതൃ മാതാവ് നന്ദിനിയ്ക്കൊപ്പം വീടിന്‍റെ മുൻവശത്തെ മുറിയില്‍ ഒരുമിച്ചിരുന്ന് ആഹാരം കഴിക്കുകയായിരുന്നു. ശ്രീദേവിയും ആദിദേവും അടുക്കളയിലേക്ക് പോയപ്പോഴാണ് ശക്തമായ ഇടിയും മിന്നലും ഉണ്ടായത്.
ഇരുവരുടെയും നിലവിളി കേട്ട് നന്ദിനിയും മറ്റു മക്കളും അടുക്കള ഭാഗത്തേക്ക് എത്തിയപ്പോഴാണ് അമ്മയും കുഞ്ഞും നിലത്തു കിടക്കുന്നത് കണ്ടത്. ബഹളം കേട്ട് എത്തിയ അയല്‍വാസികളും ചേർന്നാണ് ഇരുവരെയും ആശുപത്രിയില്‍ എത്തിച്ചത്.
ആദ്യം നെടുമ്പന ടിബി ആശുപത്രിയിലും പിന്നീട് പാരിപ്പള്ളി മെഡിക്കല്‍ കോളജ് ആശുപത്രിയിലും എത്തിച്ചു. കുഞ്ഞിന്‍റെ നില ഗുരുതരമായതോടെയാണ് തിരുവനന്തപുരം എസ്‌എടി ആശുപത്രിയിലേക്കു കൊണ്ടു പോയത്.
2 മണി കഴിഞ്ഞതോടെ മഴ നേരിയ തോതില്‍ ശമിച്ചെങ്കിലും മിന്നലും ഇടിയുംശക്തമാവുകയായിരുന്നു. കുറച്ച്‌ നാള്‍ മുൻപും ഇതേ ഭാഗത്ത് ഒരു വീട്ടില്‍ ഇടിമിന്നലേറ്റിരുന്നതായ് പഞ്ചായത്തംഗം നിസാമോള്‍ അറിയിച്ചു.
